Kryetari i Partisë Demokratike, Sali Berisha ka reaguar në lidhje me sulmin me armë zjarri që ndodhi pak pas mesnatës ndaj godinës së Top Channel, ku për pasojë humbi jetën roja i sigurisë.
Berisha me anë të një postimi të bërë në rrjete sociale e cilëson sulmin ndaj Top Channel si një akt kriminal të shëmtuar. Ai thotë se kjo ngjarje është një “dëshmi tjetër e dhimbshme e pasigurisë së plotë që ekziston sot në vend nga vendosja e regjimit në duart e krimit”.
Ndërkohë i shpreh ngushëllimet familjes së viktimës, miqve, të afërmve dhe kolektivit të Top Channel.
“Një akt kriminal i shëmtuar. Sulmohet me armë zjarri Top Channel dhe ekzekutohet në kabinën e tij roja e objektit. Dënoj me ashpërsinë më të madhe këtë akt të shëmtuar kriminal dhe i shpreh ngushëllimet e mia më të ndjera familjes së viktimës, miqve, të afërmve dhe kolektivit të Top Channel. Denoncoj këtë akt kriminal, si dëshmi tjetër e dhimbshme e pasigurisë së plotë, që ekziston sot në vend nga vendosja e rendit nga regjimi në duart e krimit”, shkruan Berisha./Opinion.al
