Dy të rinj kanë rënë në prangat e policisë së Shkodrës, të dyshuar si autorë të goditjes dhe sulmit ndaj trajnerit të “Vllaznisë”, Ernest Gjoka.
Përmes një njoftimi për mediat, policia sqaron se janë arrestuar shtetasit Nehat Fojleta 19 vjeç dhe Sehar Xhenje 21 vjeç, të dy banues në Shkodër.
“Arrestimi i tyre u bë pasi më 22 shkurt 2018, rreth orës 17:00, në afërsi të fushës sportive, shtetasi Nehat Fojleta është afruar duke kanosur dhe goditur trajnerin e ekipit të futbollit “Vllaznia”. Më pas ai është larguar me mjetin tip “Benz” me targa AA 282 KR. Drejtues mjeti ka qenë shtetasi Sehar Xhenje i cili ka ndihmuar të largohen nga vendi i ngjarjes” sqaron policia.
Në cilësinë e provës materiale u sekuestrua mjeti që shërbeu për largimin e autorit të dyshuar pas sulmit.
Në bashkëpunim të ngushtë me Prokurorinë, policia e Shkodrës po punon intensivisht për zbardhjen e motiveve dhe qëllimit të kësaj ngjarje.
