Ish-drejtuesi i grupit të krahut të djathtë, Proud Boys, është dënuar me 22 vjet burgim për rolin e tij në sulmin e 6 janarit të vitit 2021 ndaj Kapitolit.
Ky është dënimi më i rëndë i dhënë deri më tani lidhur me sulmin e 6 janarit.
Tarrio, 39 vjeç, nuk ishte në Uashington gjatë trazirave, por ndihmoi në organizimin e përfshirjes së grupit të ekstremit të djathtë.
Më shumë se 1,100 njerëz janë arrestuar nën akuzat për trazirat e Kapitolit. Rebelët kishin dalë në mbështetje të presidentit të atëhershëm Donald Trump, i cili vazhdon të refuzojë humbjen e zgjedhjeve të vitit 2020. Ndërsa Trump ka premtuar se do të falë shumicën ose të gjithë protestuesit nëse ai rizgjidhet president në vitin 2024. Tarrio u dënua me akuzën komplot për kryengritje.
Përpara se të mësonte fatin e tij të martën, ai i emocionuar i kërkoi falje policisë dhe banorëve të Uashington DC për rolin e tij në trazira.
“Unë jam jashtëzakonisht i turpëruar dhe i zhgënjyer që atyre iu është shkaktuar pikëllim dhe vuajtje,” i tha ai gjykatës federale të Uashingtonit. “Do të më duhet të jetoj me atë turp për pjesën tjetër të jetës sime”.
Tarrio, i veshur me një uniformë burgu portokalli, shtoi: “Unë isha armiku më i keq i vetes”.
“Isha viktimë dhe i shënjestruar në mënyrë të padrejtë”.
Duke pranuar se zoti Trump kishte humbur zgjedhjet presidenciale të nëntorit 2020, Tarrio tha: “Dëmtimi apo ndryshimi i rezultateve të zgjedhjeve nuk ishte qëllimi im. “Unë nuk mendoja se ishte e mundur të ndryshoheshin rezultatet e zgjedhjeve.”
“Të lutem trego mëshirë,” iu drejtua Tarrio gjyqtarit. “Të kërkoj që të mos më marrësh të 40-at”.
Në një moment më parë, ai mund të shihej duke fshirë lotët nga sytë e tij, ndërsa nëna e tij i kërkoi gjyqtarit butësi.
Tarrio ishte kryetar i grupit “Proud Boys”. I themeluar në qytetin e Nju Jorkut në vitin 2016, anëtarët e grupit të ekstremit të djathtë e kanë përshkruar veten si një klub vetëm për meshkuj.
Ata e konsideronin veten si këmbësorët e zotit Trump dhe shpesh kanë qenë të përfshirë në përleshje në rrugë me aktivistët e ekstremit të majtë antifashistë.
