Situata në Lindjen e Mesme mund të përshkallëzohet më tej pas sulmit hakmarrës të Izraelit kundër Iranit. Sipas një raporti ekskluziv të medias amerikane, Wall Street Journal, qeveria në Teheran po planifikon një tjetër sulm ndaj Izraelit.
Kundërsulmi do të jetë “i dhunshëm dhe kompleks”, citoi gazeta amerikane “The Wall Street Journal” një zyrtar egjiptian i cili ishte i informuar për planet. Një sulm i ri do të përdorte raketa me koka luftarake më të mëdha se në sulmin e mëparshëm më 1 tetor, raportoi WSJ, duke cituar informatorë iranianë dhe arabë.
Përveç Gardës Revolucionare do të vendoseshin edhe forcat e rregullta të armatosura. Sulmi i fundit izraelit në Iran la të vdekur katër ushtarë iranianë dhe një civil. “Ushtria jonë ka humbur ushtarë, ndaj duhet të përgjigjet”, citoi për WSJ një zyrtar iranian. Irani mund të nisë sulmin e ri nga Iraku dhe do të jetë “shumë më agresiv se herën e kaluar”.
Sipas WSJ, Irani nuk dëshiron të ndikojë në zgjedhjet amerikane me kundërsulmin e tij. Prandaj, sulmi do të vijë pas votimit të së martës, por para inaugurimit të kreut të ardhshëm të shtetit të Shteteve të Bashkuara në janarin e ardhshëm, tha zyrtari iranian për gazetën amerikane.
Ambasadorja e SHBA-së në Kombet e Bashkuara, Linda Thomas-Greenfield, kërcënoi Iranin me pasoja të rënda në rast të një sulmi të ri ndaj Izraelit. “Ne besojmë se ky duhet të jetë fundi i shkëmbimit të drejtpërdrejtë të zjarrit midis Izraelit dhe Iranit,” tha ajo.
Sakaq, Iranianët organizuan një tubim masiv të dielën në ambientet e ish-ambasadës amerikane, duke brohoritur me parulla kundër vendosjes ushtarake amerikane në Lindjen e Mesme, hegjemonisë së saj dhe dhunës izraelite.
Tubimi shënoi 45-vjetorin e marrjes së ish-ambasadës amerikane në Teheran dhe “Ditën Kombëtare të Luftës kundër Arrogancës Globale”, e njohur gjithashtu si “Dita Kombëtare e Studentëve”. Protestuesit thanë se me mbështetjen dhe pajtimin e Shteteve të Bashkuara, Izraeli vazhdon të provokojë vendet e tjera, duke bërë që tensionet rajonale të përshkallëzohen.
Ata thanë se Irani do të mbrojë me vendosmëri interesat e tij kombëtare dhe nuk do të ketë frikë nga kërcënimet e SHBA-së dhe Izraelit.
