Irani ka nisur një valë të re sulmesh, me raketa që godasin Izraelin qendror.
Sipas mediave të huaja është rritur në 10 numri i të vdekurve nga sulmet iraniane gjatë natës në tokën izraelite.
Mediat izraelite raportuan se ekipet e shpëtimit vazhdojnë kërkimet për 20 persona të zhdukur dhe deri më tani janë regjistruar gjithsej gjashtë vdekje.
Katër persona të tjerë vdiqën në sulmin në Tamra, në veri të vendit, teksa të paktën 200 persona u plagosën.
Ndërkohë presidenti i Izraelit, Isaac Herzog, shprehu dhimbjen e tij për izraelitët që u vranë nga sulmet raketore iraniane gjatë natës, duke e përshkruar mëngjesin si “shumë të trishtueshëm dhe të vështirë”.
“Vëllezërit dhe motrat tona u vranë dhe plagosën mbrëmë nga sulme kriminale iraniane ndaj popullsisë civile në Bat Yam, Tamra dhe komunitete të tjera.
Hebrenj dhe arabë, qytetarë dhe emigrantë, përfshirë fëmijë, të moshuar, gra dhe burra.
Ndjej dhimbjen e thellë të familjeve dhe pikëllimin për humbjen e tmerrshme.
Lutem për shërimin e të plagosurve dhe gjetjen e të zhdukurve. Do të vajtojmë së bashku. Do ta kapërcejmë këtë së bashku”, shkroi ai në një postim në rrjetin social X.
