Administrata ushtarake e Kievit tha të hënën se kryeqyteti ukrainas u vu nën sulme me dronë rusë, disa orë pasi presidenti Volodymyr Zelenskyy ripërtëriu thirrjet e tij drejtuar aleatëve për të ndihmuar forcimin e mbrojtjes ajrore të Ukrainës në betejën e saj kundër agresionit rus.
Forcat ukrainase rrëzuan nëntë dronë Shahed të prodhuar nga Irani të hënën, tha administrata ushtarake e Kievit, në një postim në rrjetin Telegram.
Rusia ka përdorur vazhdimisht dronët për të sulmuar Kievin dhe qytetet e tjera të Ukrainës.
Presidenti Zelenskyy tha në fjalimin e tij të natës të dielën se mbrojtja ajrore është një “përparësi e vazhdueshme” për administratën e tij.
“Duke na ndihmuar të mbrojmë plotësisht qiejt tanë, duke na ofruar sisteme më moderne të mbrojtjes ajrore në numër të mjaftueshëm, ju mund t’ia hiqni nga duart shtetit terrorist instrumentin e tij kryesor të terrorit”, tha presidenti Zelenskyy. “Ky do të jetë një nga hapat më të fuqishëm që do të afrojë fundin e agresionit. Rusia do të detyrohet të ndjekë rrugën e ndërprerjes së agresionit, kur nuk mund të ndjekë më rrugën e sulmeve me raketa”.
Oksana Markarova, ambasadorja e Ukrainës në Shtetet e Bashkuara, i tha ABC News të dielën se, “ne e shohim se çfarë ndodh kur nuk kemi mjaftueshëm mbrojtje ajrore”.
Ambasadorja Markarova tha se gjysma e rrjetit energjetik të Ukrainës është shkatërruar nga raketat ruse. “Duhet ta ndalojmë. Dhe e vetmja mënyrë për ta bërë këtë është forcim i mbrojtjes ajrore kudo në Ukrainë”, tha ajo.
Zyrtarët amerikanë thonë se po planifikojnë të dërgojnë një bateri të mbrojtjes ajrore raketore Patriot në Ukrainë për të ndihmuar kundër sulmeve ajrore ruse, por asnjë njoftim zyrtar nuk është bërë. Rusia e ka dënuar veprimin e paralajmëruar të Shteteve të Bashkuara dhe e ka cilësuar një provokim që rrit përfshirjen e SHBA-së në konflikt./ VOA
