Një turist italian është vrarë dhe shtatë persona të tjerë janë plagosur nga një sulm i dyshuar terrorist pranë një plazhi në Tel Aviv.
Ministri i Jashtëm i Italisë tha se Izraeli e kishte identifikuar viktimën si shtetasin italian Alessandro Parini, 36 vjeç.
Pamjet nga vendi i ngjarjes tregojnë një makinë të përmbysur pranë një shëtitoreje dhe një oficer policie izraelite duke hapur zjarr. Policia lokale tha se sulmuesi i dyshuar si Yousef Abu Jaber nga Kafr Qasim, një qytetar izraelito-arab u qëllua për vdekje nga oficerët, shkruan BBC.
Policia në Tel Aviv bëri me dije se ngjarja ka ndodhur në orën 21:25, ku një burrë 45-vjeçar i cili ishte duke drejtuar një makinë përgjatë shëtitores së plazhit të qytetit, ka goditur disa këmbësorë.
Sipas informacioneve përveç autorit që ka ndërruar jetë, raportohen edhe tetë të plagosur nga sulmi i ndodhur, ku bëhet me dije se të gjithë ishin turistë.
Kryeministrja italiane Giorgia Meloni shprehu “dhimbjen e saj të thellë” për vdekjen e zotit Parini dhe e përshkroi sulmin si “frikacak”.
Pas incidentit, kryeministri izraelit Benjamin Netanyahu mobilizoi policinë dhe ushtrinë si pjesë e përpjekjeve për të luftuar terrorizmin.
Sulmet në Bregun Perëndimor ndodhën disa orë pasi ushtria izraelite kreu sulme ajrore ndaj objektivave që i përkisnin grupit militant palestinez Hamas në Libanin jugor dhe në Rripin e Gazës.
Ushtria tha se sulmet ishin një përgjigje ndaj një breshëri prej 34 raketash të lëshuara nga Libani në veri të Izraelit të enjten, për të cilën fajësoi grupin.
Tensionet po rriten pas dy netëve të bastisjeve të policisë izraelite në xhaminë al-Aksa të Jerusalemit – vendi i tretë më i shenjtë i Islamit – në fillim të kësaj jave.
