Kryetarja e Lëvizjes Socialiste për Integrim, Monika Kryemadhi ka replikuar lidhur me rastin e një gruaje naftëtare që thoshte se Kryemadhi ishte tallur në takimin me to pasi kishte thënë se kishte porofolin bosh.
Në një postim në Facebook, Kryemadhi ka publikuar momentin e këtij episodi dhe shton se gruaja në fjalë është përdorur për sulm politik ndaj saj pasi nuk ka qenë fare në takim.
Ajo akuzon kryeministrin Rama se e ka çuar gruan me urdhrin e tij që të japë atë deklaratë.
Teksa i kujton se gratë greviste nuk janë mish për top, Kryemadhi i kërkon Ramës që “t’i largojë duart nga gratë e Fierit”.
Postimi i plotë:
Edi, unë e di sa të djegin të vërtetat që unë artikuloj pa frikë ndaj teje dhe oligarkëve që je lidhur aq ngushtë. E kuptoj se marazi të ka errur sytë. Këto ishin gratë greviste që unë takova në Ballsh dhe jo mamaja e nderuar e një punonjësi Bashkie rilindase që sot e kishe çuar me urdhër për ta përdorur në sulm politik ndaj meje.
Bëji nder familjes tënde dhe largoji duart nga gratë e Fierit, se ato nuk janë mish për top për inatet politike që po të shtohen tani teksa po të ngushtohet laku në shterim të ditëve të pushtetit.
Kurajo për gratë greviste të cilat i mbështes në betejën për të drejtat e tyre dhe forca e grave të Shqipërisë, për t’u bërë bashkë më 25 Prill që të ndërtojmë Shqipërinë që nuk i shfrytëzon dhe nëpërkëmb por i jep vendin e duhur grave e vajzave të vendit!/ Opinion.al
