Tre persona janë vrarë ditën e sotme në një sulm me thikë në rajonin qendror të Nagano të Japonisë, duke përfshirë dy oficerë policie.
Mediat e huaja bëjnë me dije se më herët policia tha se një burrë i maskuar që mbante një pushkë dhe një thikë ishte fshehur në një ndërtesë në Nagano pasi sulmoi të paktën katër persona.
Oficerët kishin nxituar në vendngjarje pasi një këmbësor raportoi mbi ngjarjen e ndodhur në qytetin Nakano në prefekturën qendrore japoneze të Nagano.
Një dëshmitar tha për televizionin publik NHK se një grua u rrëzua ndërsa po ndiqej nga i dyshuari, i cili më pas e theri me thikë dhe shtiu në drejtim të dy oficerëve të policisë pasi arritën në vendin e ngjarjes.
Tre nga viktimat u dërguan në një spital aty pranë, përfshirë gruan, dhe më vonë u shpallën të vdekur, tha policia.
Policia e përshkroi të dyshuarin si një burrë i veshur me veshje kamuflazhi, kapele, maskë dhe syze dielli, tha agjencia e lajmeve Kyodo.
Japonia ka një nga nivelet më të ulëta të dhunës me armë në botë. Ka pasur më shumë se katër vrasje me armë zjarri në SHBA për 100,000 njerëz gjatë vitit 2019, krahasuar me pothuajse zero në Japoni.
Ligjet strikte të Japonisë për pronësinë private të armëve kanë origjinë befasuese në Shtetet e Bashkuara. Kur SHBA pushtoi Japoninë pas Luftës së Dytë Botërore, ajo çarmatosi vendin. Amerikanët formësuan legjislacionin që i largonte armët e zjarrit kryesisht nga duart e civilëve japonezë./Opinion.al
