Autoritetet në shtetin amerikan të Indianës thanë të premten se nuk e kanë identifikuar ende personin e armatosur që sulmoi një objket të FedEx-t pranë aeroportit të Indianapolis-it, duke vrarë tetë persona dhe plagosur disa të tjerë para se të vriste veten.
Zëvendës shefi i policisë së qytetit tha se personi i armatosur filloi të qëllonte pa dallim mbi njerëzit në parking dhe më pas u fut në ndërtesë, ku vrau veten pak para se aty të hynte policia.
Policia tha se të shtënat zgjatën vetëm disa minuta. Pesë persona u shtruan në spital, sipas autoriteteve. Dy persona të tjerë u trajtuan në vendin e ngjarjes.
Hetuesit janë duke zhvilluar intervista dhe duke mbledhur informacione për identifikimin e personit që sulmoi. Kompania FedEx tha në një deklaratë se po bashkëpunon me autoritetet për të mbledhur më shumë informata.
Familjarët u mblodhën në një hotel lokal për të pritur informacione për të afërmit e tyre. Disa thanë se punonjësve nuk u lejohet të kenë telefonat e tyre me vete ndërsa punojnë me turne në objekt, duke e bërë të vështirë kontaktin me ta, njoftoi stacioni televiziv WTHR.
Ky ishte sulmi i fundit në një varg të sulmesh në Shtetet e Bashkuara muajt e fundit. Tetë vetë mbetën të vrarë në një sallon masazhesh në Atlanta të Xhorxhias; 10 vetë gjetën vdekjen në një dyqan ushqimesh në Boulder të Kolorados; katër vetë, ndër ta një djalë 9-vjeçar, humbën jetën kur një individ i armatosur hapi zjarr në një zyrë të shitjes së pasurive të patundshme në Orinxh të Kalifornisë.
Ky është incidenti i tretë me vrasje të shumëfishta këtë vit në Indianapolis. Pesë persona, përfshirë një grua shtatzënë, u qëlluan dhe u vranë në muajin janar, dhe një burrë u akuzua për vrasjen e tre të rriturve dhe një fëmije para se të rrëmbente vajzën e tij gjatë një grindjeje në një shtëpi në muajin mars./ VOA
