Katër persona janë vrarë ndërsa dhjetëra të tjerë janë plagosur përgjatë natës në Kiev, si pasojë e sulmeve me raketa dhe dronë, ka bërë të ditur kryetari i qytetit, Vitali Klitschko.
“Katër persona janë konfirmuar të vdekur në kryeqytet. Operacionet për kërkim-shpëtim janë duke vazhduar në disa lokacione”, ka bërë të ditur Klitschko në Telegram.
Sulmet intensive kanë zgjatur disa orë dhe raportohet të jenë kryer me raketa lundruese dhe dronë kamikazë.
Tymur Tkachenko, shef i departamentit ushtarak, ka thënë se dronët kanë goditur katet e një ndërtese të lartë në anën lindore të qytetit, dhe për pasojë ka shpërthyer zjarri.
Presidenti ukrainas, Volodymyr Zelensky e ka dënuar sulmin masiv me dronë, që ka prekur shumë rajone të shtetit.
“Rusia nuk del nga vijat e saj – një tjetër sulm masiv në qytete dhe përditshmërinë e njerëzve”, ka thënë Zelensky. Ai ka shtuar se në sulme janë përfshirë mbi 400 dronë dhe më shumë se 40 raketa, përfshirë ato balistike.
Sipas Zelenskyt, 49 njerëz janë plagosur, ndonëse numri mund të rritet. Në mesin e të vrarëve janë tre zjarrfikës – Pavlo Yezhor, Danylo Skadin dhe Andriy Remenniy – të cilët kanë qenë duke punuar nën rrënoja për t’iu ndihmuar njerëzve.
Zelensky i ka bërë thirrje komunitetit ndërkombëtar, sidomos Shteteve të Bashkuara dhe Evropës, që të kenë përgjigje më të ashpër.
“Nëse dikush nuk është duke rritur presionin dhe po ofron kohë që të humbin edhe më shumë jetë njerëzish, ajo është bashkëfajësi. Na duhet të veprojmë me vendosmëri”, ka thënë ai.
