Një Surprizë e madhe i pret shikuesit e serialit më të ri në Televizionin Klan “Sulltanesha Kosem” mbrëmjen e së mërkurës. Rolin kryesor nga episodi i 17-të nuk do ta luajë më aktorja greke Anastasia Thsilimpou, por aktorja e dashur turke Beren Saat, e njohur në Shqipëri për rolet e Jamurit në serialin “Hakmarrja” dhe Bihterit tek “Dashuri e Ndaluar”.
Nga një adoleshente që kërkonte të largohej nga pallati i sulltanit, në kohën që roli luhej nga aktorja greke, tashmë Sulltanesha Kosem do të jetë një personazh shumë i pushtetshëm.
Pas shumë tentativave të dështuara për t’u larguar, e preferuara e Sulltanit Ahmet merr një vendim shumë të rëndësishëm.
“Unë jam Anastasia, dikur i ruhesha një pike shiu, tani jam e gatshme të sakrifikohem…Po vij, lamtumirë fëmijëri, lamtumirë e shkuara ime… jam gati të jap jetën për dashurinë”, thotë Sulltanesha Kosem teksa u del përballë kryengritësve duke u thënë se Sulltan Ahmeti nuk ka vdekur.
Javën e kaluar, i ftuar tek emisionin “Rudina”, Drejtori i Programacionit në Televizionin Klan, Robert Dumani, e paralajmëronte kështu futjen në serial të aktores së dashur, Beren Saat.
