Ish-drejtoresha e Teatrit të Metropolit në kohën kur Lulzim Bashës ishte kryetar bashkie, aktorja Suela Konjari u bëri thirrje kolegëve të saj që të tejkalojnë bindjet partiake majtas dhe djathtas pasi teatri është mbi partitë politike.
“Kur mbaron një shfaqje teatri të gjithë e dimë që melodia e parë që vjen për aktorin në skenë, është duartrokitja e publikut. Dhe kur duartrokasin njerëzit, ngrenë dorën e majtë që e bashkojnë me dorën e djathtë dhe na dhurojnë ne atë melodi brilante për të cilën ne japim edhe frymën, edhe jetën. Thënë këtë dua të them, që ju ftoj të gjithëve, veten time të parën, ju dhe gjithë kolegët e mi, edhe specialistë, që t’i tejkalojnë bindjet partiake, është teatri mbi partitë.
Shpresoj shumë dhe do të dëshiroja që të arrihet një gjuhë e përbashkët sepse çelësi sekret për t’i zgjidhur problemet në këtë botë kaq të ndërlikuar ku jetojmë është thjesht dashuria dhe ta dëgjojmë dhe ta besojmë njëri-tjetrin.
Ne duhet të besohemi tek njëri-tjetri dhe teatri na jep mundësinë që ta duam njëri-tjetrin dhe ta besojmë. Shpresoj që të arrijmë më të mirën e mundshme”, deklaroi Konjari dje gjate tryezes se mbledhur nga Erion Veliaj.
