Dy forcat rivale që luftojnë për kontroll në Sudan kanë thënë të dyja se janë të gatshme të ndihmojnë në evakuimin e shtetasve, duke rritur shpresat se fuqitë ndërkombëtare mund të shpëtojnë së shpejti qytetarët e bllokuar pas një jave luftimesh.
Në një deklaratë, ushtria e Sudanit tha se kishte rënë dakord të lehtësonte evakuimin e shtetasve dhe diplomatëve nga një numër vendesh, duke përfshirë Shtetet e Bashkuara, Mbretërinë e Bashkuar, Francën dhe Kinën.
Evakuimet pritet të fillojnë “brenda orëve në vijim”, sipas deklaratës.
Të premten, Forcat e Mbështetjes së Shpejtë (RSF) thanë se ishin gati të rihapnin pjesërisht të gjitha aeroportet në Sudan për trafikun ajror për të lejuar vendet të evakuojnë shtetasit e tyre.
Luftimet e ashpra shpërthyen në Sudan të shtunën e kaluar midis Forcave të Armatosura të Sudanit (SAF), të komanduara nga udhëheqësi ushtarak i Sudanit, gjenerali Abdel Fattah Al-Burhan dhe paraushtarakëve RSF të udhëhequr nga Mohamed Hamdan Dagalo.
Të dy janë ish-aleatë, por tensionet mes tyre u ngritën gjatë negociatave për integrimin e RSF-së në ushtrinë e vendit, si pjesë e planeve për të rivendosur sundimin civil.
Më shumë se 400 njerëz janë vrarë dhe 3,550 janë plagosur në luftimet, sipas Organizatës Botërore të Shëndetësisë (OBSH), dhe në terren situata humanitare po përkeqësohet.
OKB thotë se njerëzit po ikin gjithnjë e më shumë nga zonat e goditura nga luftimet, duke përfshirë Hartum. Deri në 20,000 refugjatë kanë mbërritur në Çadin fqinj, thotë OKB.
Njoftimet për evakuime erdhën pasi përleshjet e reja midis dy grupeve shkatërruan një armëpushim tre-ditor të shpallur për festën myslimane të Bajramit.
Luftimet u raportuan në Khartoum të shtunën, me dëshmitarët që thanë për CNN se përleshje të ashpra po ndodhnin në afërsi të pallatit presidencial dhe u dëgjuan tingujt e shpërthimeve dhe avionëve luftarakë që fluturonin lart. Arabia Saudite tha të shtunën se përpjekjet e saj për evakuim ishin duke u zhvilluar. Ministria e Jashtme saudite tha në një deklaratë se qeveria po evakuonte qytetarët e saj nga Sudani së bashku me “disa shtetas të vendeve vëllazërore dhe mike”./Opinion.al
