Luis Suarez ka realizuar 43 gola deri tani në këtë sezon me Barcelonan, por sulmuesi ka pranuar se ka pasur dyshime mbi veten dhe nëse ishte në lartësinë e duhur për një skuadër si Barcelona.
Suarez u transferua te Barcelona nga Liverpool në 2014ën dhe ka qenë një nga arsyet kryesore të sukseseve të arritur nga katalanasit në dy vitet e fundit.
Transferimi në Katalunjë ka qenë realizimi i një ëndrre në aspektin sportiv dhe atë familjar. “Më pëlqen Barcelona. Ky qytet më ka tërhequr qëkur jam njohur me Sofian (bashkëshortja). Ajo erdhi të jetonte këtu dhe unë kam ardhur shpesh që ta takoja. Është qyteti që na ndau në atë kohë dhe që na ka bashkuar tani”.
Suarez ka folur edhe për mënyrën se si është ndier gjatë periudhës së pezullimit, pas kafshimit ndaj Chiellinit në Kupën e Botës, duke thënë se fëmijët e kanë ndihmuar që ta kalonte atë moment.
“Ka qenë diçka pozitive sepse ata kanë parë se babai nuk është perfekt”. Pas asaj që ndodhi me Chiellinin, Suarez ka shkuar te një psikolog, por jo vetëm për të folur për atë çështje. “Ato ditë kam mësuar se duhet të tregohesha më i zgjuar, të mos i mbaja gjërat brenda vetes. Psikologu më ka ndihmuar shumë, jo vetëm në futboll, por edhe në jetën time”.
Më pas, sulmuesi ka shpjeguar se mendonte se nuk ishte në lartësinë e duhur për Barcelonan.
Ëndërroja të luaja me Barçën, por nuk besoja se isha në lartësinë e duhur për të qenë numri 9 i Barcelonas. Gjithmonë ëndërron të luash me më të mirët dhe tani po e bëj këtë, me Messi, Neymar, Iniesta, Busquets etj”.
Në fund, uruguajani ka folur edhe për marrëdhënien e ngushtë që ka me dy shokët e sulmit, Neymar dhe Messi. “Për ne nuk ka rëndësi se kush shënon, duam vetëm që skuadra të marrë rezultate. Objektivi ynë është që të fitojmë bashkë. Jemi të gjithë të lumtur, nuk ka xhelozi mes meje, Neymar dhe Messi. Gjithçka është e natyrshme mes nesh”, ka përfunduar Suarez.
