Shtetet e Bashkuara të Amerikës rrezikohen të goditen nga një uragan. Stuhia “Barry” ka bërë që Presidenti Donald Trump, të shpallë gjendjen e emergjencës në Luiziana, por ajo tashmë është duke u fuqizuar edhe më shumë dhe pritet të prekë tokën.
Sipas meteorologëve stuhia ka shtuar fuqinë mbi gjirin e Meksikës dhe shpejtësia e erës ka shkuar në 104 km në orë. Kur ajo të prekë tokën pritet që të ketë forcën e një uragani dhe do të bëhet i pari i sezonit të 2019 në Atlantik.
Qyteti i Nju Orlinsit pritet të goditet nga reshje shiu të mëdha pas përmbytjeve të orëve të fundit.
Autoritetet paralajmëruan se përmbytjet përbëjnë një rrezik të madh, por vendimi për të shpallur gjendjen e emergjencës ka bërë që të çlirohen burimet federale për situata të tilla kritike.
Ky uragan do të testojë fortifikimet nga përmbytjet që u ndërmorën pas uraganit Katrina në 2005, që e zhyti pjesën më të madhe të Nju Orlinsit nën ujë.
Mijëra banorë janë udhëzuar për evakuim, ndërsa në disa zona të tjera, mijëra familje janë përgatitur duke mbledhur rezerva ushqimesh dhe uji. /Opinion.al
