Një grup studiuesish, të udhëhequr nga një ekip i spitalit të fëmijëve në Londër “Great Ormond Street”, kanë analizuar gjendjen e 582 fëmijëve të prekur nga Covidi, të moshës tre ditë deri në 18 vjeç, në 25 vende të Evropës.
Studimi sugjeron se vdekjet mes tyre janë jashtëzakonisht të rralla. Vetëm katër nga 582 fëmijë kanë humbur jetën, dy prej të cilëve kanë pasur sëmundje shoqëruese.
Sipas studimit, rreth një në dhjetë fëmijë ka pasur nevojë për terapi intensive dhe simptomat tek ta janë përgjithsësisht të buta, ndërsa disa prej tyre janë krejtësisht asimptomatikë.
Fëmijët kanë pasur zakonisht temperaturë (65%), infeksion të traktit të sipërm respirator (54%), pneumoni (25%) dhe simptoma gastrointestinale (22%).
Disa nga fëmijët (16%), shumica e të cilëve janë testuar për shkak të kontaktit të ngushtë me një rast të njohur, nuk kanë pasur fare simptoma./Opinion.al
