Ngrohja globale mund të ketë favorizuar shfaqjen e virusit SarsCoV2. Është ky përfundimi i një studimi të kryer nga Universiteti i Kembrixhit botuar në revistën “Science of the total environment”, e cilaq për herë të parë vendos një lidhje midis kushteve klimatike të pyjeve në Kinën Jugore dhe shfaqjes së koronavirusëve që mbartin lakuriqët e natës, shkruan Ansa.
Hulumtimi studioi ndryshime në shkallë të gjerë në bimësi në provincën jugore kineze të Yunnan, Mianmar dhe Laos.
Me rritjen e temperaturave, rrezeve të diellit dhe dioksidit të karbonit në atmosferë, ndryshimi i klimës ka ndryshuar habitatet natyrore, nga savana tropikale te pyjet gjetherënëse, të cilat janë bërë ambiente të përshtatshme për shumë specie dhe llojeve të lakuriqëve të natës që jetojnë në pyje.
Në fakt, studiuesit zbuluan se, krahasuar me mesataren, numri i specieve të lakuriqëve të natës që u zhvendosën në Kinën Jugore në shekullin e kaluar është rritur me 40%, ku janë izoluar më shumë se 100 lloje të koronavirusëve që vijnë nga lakuriqët e natës. Kjo zonë është gjithashtu vendi ku të dhënat gjenetike sugjerojnë se mund të ketë lindur koronavirusi SarsCoV2.
“Ndryshimi i klimës gjatë 100 viteve të fundit e ka bërë provincën Yunnan habitatin ideal për speciet e shumta të lakuriqëve të natës”, komenton Robert Beyer, autori i parë i studimit. Ndërsa klima ka ndryshuar habitate, speciet kanë lënë disa zona dhe janë zhvendosur në të tjera, duke marrë viruset me vete. “Kështu rajonet ku viruset ishin të pranishëm kanë ndryshuar duke bërë të mundur edhe ndërveprimet e reja midis kafshëve dhe patogjenëve, çka ka bërë që disa viruse të evoluojnë në mënyrë që t’i bëjnë ato më të dëmshme për t’u transmetuar”.
Në botë ekzistojnë rreth 3,000 lloje të koronavirusëve të mbartur nga lakuriqët e natës dhe secila specie e këtyre gjitarëve mbart mesatarisht 2.7 lloje të tyre. Ndryshimi i klimës ka rritur gjithashtu numrin e specieve të lakuriqëve të natës në Afrikën Qendrore, Amerikën Qendrore dhe Jugore. “Ne kemi nevojë për kufij për zgjerimin e zonave urbane dhe bujqësore – thonë studiuesit – dhe ne duhet të kërkojmë hapësira në habitatet natyrore për të zvogëluar kontaktin midis njerëzve dhe kafshëve që mbartin sëmundje”./Opinion.al
