Masat shtrënguese kundër koronavirusit, në të gjithë globin, nuk duhet të hiqen, derisa të gjendet vaksina e Covid-19. Të paktën, kështu thuhet në një studim të ri të publikuar në revistën shkencore “The Lancet”, i cili bazohet mbi sjelljen e virusit në Kinë.
Kufizimet e ashpra të Kinës duket se kanë ndalur valën e parë të Covid-19 në pjesën më të madhe të vendit, por studiuesit përdorën modelimin matematikor për të treguar se heqja e parakohshme e masave mund të rikthejë një valë të dytë të infeksionit.
Autoritetet i dhanë fund shtet-rrethimit 76-ditor në Wuhan, vendin e origjinës së koronavirusit ndërkohë që pjesa tjetër e globit është në periudhën më delikate të virusit.
Frika kryesore e studiuesëve janë rritja e rasteve të importuara tani që shkollat, bizneset, fabrikat dhe jeta sociale ka nisur sërish.
Ky studim, është i mendimit se shpejtësia e infeksionit mund të rritet sërish nëse qeveritë nuk monitorojnë siç duhet lirimin e masave. Fundi i karantinës është i sigurtë vetëm në momentin e gjetjes së vaksinës.
“Ndërsa këto masa kontrolli duket se kanë zvogëluar numrin e infeksioneve në nivele shumë të ulëta, pa imunitet kundër Covid-19, rastet mund të rikthehen lehtësisht pasi bizneset, puna në fabrika dhe rifillimi i shkollavec rrisin përzierjen sociale, veçanërisht duke pasur parasysh rrezikun në rritje të rasteve të importuara nga jashtë, pasi Covid-19 vazhdon të përhapet globalisht”, thotë Profesori Joseph T Wu nga Universiteti i Hong Kongut, i cili bashkëdrejtoi studimin.
Ai paralajmëroi se shpejtësia e infeksionit do të rritet nëse qeveritë nuk sigurojnë që kufizimet të hiqen ngadalë dhe transmetimi të monitorohet nga afër.
“Megjithëse politikat e kontrollit të tilla si distanca fizike dhe ndryshimi i sjelljes ka të ngjarë të mbahen për ca kohë dhe ka të ngjarë të jetë strategjia më e mirë derisa vaksinat efektive të bëhen gjerësisht të disponueshme”, shtoi profesori./Opinion.al
