1.5 bilion njerëz kanë tashmë një llogari në facebook, nga të cilat 1 bilion janë aktivë në rrjetin social çdo ditë. Në 2015, numri i përdoruesve në facebook është bërë edhe më i madh se sa popullsia e Kinës, vendit më të populluar të botës.
Përballë kësaj audience kaq të madhe, nuk është surprizë që qeveritë dhe liderët e 87 % të 193 vendeve anëtare të Kombeve të Bashkuara, tani kanë një profil në rrjetet sociale.
“Burson Marsteller”, kompani e marketingut politik global dhe komunikimit strategjik, realizoi një studim prej 512 faqesh, i cili përfaqëson 169 qeveri.
Përdorimi i facebook-ut nga qeveritë varion nga shteti në shtet. Ndërsa disa faqe shpërndajnë aktivitetin ditor të liderave të tyre, disa të tjerë angazhohen në komunikim me publikun duke u kthyer përgjigje komenteve ose duke lejuar një fluks të lirë postimesh nga vizitorët e faqeve të tyre.
Liderët e përdorin gjithashtu facebook për të ndarë jetët e tyre private me publikun, festa ditëlindjesh, foto të fëmijëve etj.
Sipas studimit, këto lloj postimesh janë përgjithësisht më populloret.
Postimi më popullor nga të gjithë liderët botërorë, u postua në faqen e Shtëpisë së Bardhë.
Një foto e familjes Obama duke i uruar fansave të tyre Pashkë të Gëzuara, e cila ka marrë 2.9 milionë pëlqime, komente dhe shpërndarje.
I dyti më popullor është Narenda Modi teksa mirëpret Barack Obamën në Indi dhe postimi i tretë më popullor është postuar po nga Shtëpia e Bardhë, që tregon presidentin teksa përqafon gruan e tij në përvjetorin e dasmës.
Interesant është fakti se si sulmet terroriste në Paris ishin postimet më të pëlqyera në faqet e liderave francezë në 2015, po aq sa edhe mesazhet e solidaritetit dhe simpatisë për njerëzit francezë nga liderat huaj si David Cameron apo Benjamin Netanyahu.
Liderat Botërorë më të pëlqyer
Sipas studimit të “Burson-Mallester”, i kryer në fillim të Janarit të 2016, 87 drejtues shtetesh, 82 kryeministra dhe 51 ministra të huaj, kanë një faqe personale në facebook. Barack Obama ishte i pari lider botëror që hapi një faqe në facebook në 2007, teksa shërbente si senator i Illinois.
Ai vazhdon të jetë ende lideri më popullor me më shumë se 46 milion pëlqime në faqen e fushatës, e cila nuk menaxhohet nga administrata e Shtëpisë së Bardhë apo vetë presidenti.
Në Nëntor të 2015, administrata amerikane krijoi një faqe zyrtare, institucionale për Presidentin e SHBA, e cila ka tërhequr 1.3 milion pëlqime në më pak se dy muaj.
Obama ndiqet nga Kryeministri Indian Narendra Modi, me më shumë se 31 milion pëlqime në faqen e tij personale dhe 10.1 milion pëlqime në faqen zyrtare të Kryeministrit të Indisë, e cila renditet e treta.
Studimi i ndan liderat edhe në më të pëlqyerit sipas kontinenteve.
Në Europë, lideri më i pëlqyer në facebook është Presidenti turk Rexhep Tahip Erdogan me 7 milion e 991 mijë pëlqime.
Ai ndiqet nga faqja e Monarkisë Britanike, Presidenti Rumun Klaus Iohannis, Kancelarja Gjermane Angela Merkel, Kryeministri Rus Dmitri Medvedev dhe Kryeministri i Shqipërisë Edi Rama. Kështu Rama, renditet i gjashti në Europë.
Por sa shpesh postojnë këta lidera? Kush poston më shpesh?
Faqja në facebook e Presidencës së Republikës Dominikane është faqja më aktive, me një mesatare prej më shumë se 27 postime për çdo ditë në 2015.
Qeveritë e Botswanës dhe Filipineve janë pothuajse po kaq aktive, me më shumë se 20 postime për ditë, duke i kthyer faqet e tyre në shërbim të lajmeve qeveritare.
Por postimet e shpeshta jo dosdoshmërisht përkthehen në interaktivitet më të madh.
Kryeministri i Indisë Narendra Modi është kampioni i padiskutuar i liderit me interaktivitetin ose ndërveprimin më të madh virtual (shumësia e pëlqimeve,komenteve dhe shpërndarjeve të postimeve), me më shumë se 215 milion ndërveprime në 2015, më shumë se 5 herë se sa faqja më popullore në facebook e Presidentit Obama.
Faqja e presidentit të Argjentinës Mauricio Macri renditet e dyta për ndërveprimin e lartë, ndonëse ka vetëm 3 milion pëlqime.
Cili është lideri më efektiv i botës?
Pa dyshim Kryeministri Indian Narendra Modi, pasi ka një mesatare prej 186.000 ndërveprimes në secilin postim të tij të 2015. Presidenti turk është i dyti me 127.432 ndërveprime për postim.
Studimi analizon edhe përmbajtjen e postimeve në faqet virtuale të liderave.
Dominojnë fotografitë dhe rekordin e mban Presidenca e Republikës Dominikanë me 5.100 foto në 2015.
Në vend të dytë renditet qeveria e Filipineve me 1000 foto më pak të postuara.
Disa lidera botërorë, në veçanti Presidenti i Argjentinës Mauricio Macri, Presidenti i Brazilit Dilma Rousseff, Kryeministri Kanadez Justin Trudea dhe Shtëpia e Bardhë, kanë testuar tashmë transmetimin live të videove në facebook, duke shpërndarë kështu fjalimet e tyre.
Përktheu Alteo Hysi
