Një studim i 10 rasteve me koronavirus nga tre familje që kanë darkuar në të njëjtin restorant në jug të Kinës, ka sugjeruar që kondicionimi i ajrit ndihmon në transmetimin e stërkalave dhe mikrobeve.
Studimi i bazuar në infeksionet në qytetin e Guangzhou, në fund të janarit, thotë se qarkullimi i ajrit nga kondicioneri mund të ketë shpërndarë stërkalat tek të tre tavolinat.
Jianyun Lu, i Qendrës së Kontrollit dhe Parandalimit të Sëmundjeve në Guangzhou, është shprehur se restorantet duhet të rrisin hapësirën midis tavolinave dhe të përmirësojnë ventilimin për të zvogëluar rrezikun e infeksionit.
Pacienti i parë nga 10 rastet e studiuara në Guangzhou, ishte kthyer nga Wuhani në 23 janar, ku koronavirusi u raportua për herë të parë në dhjetor. Personi drekoi me tre anëtarë të familjes në 24 janar, në një restorant pa dritare dhe me kondicioner në secilin kat.
Dy familje të tjera u ulën në tryezat fqinje, me një metër distancë dhe drekuan për rreth 1 orë. Pacienti i parë pati ethe dhe kollë më vonë, po atë ditë dhe shkoi në spital. Brenda dy javësh, katër anëtarë të tjerë të familjes së tij, tre anëtarë të familjes së dytë dhe dy të familjes së tretë ishin sëmurë me Covid-19.
Pas hetimeve të hollësishme, u zbulua se i vetmi burim i njohur i ekspozimit për familjen e dytë dhe të tretë, ishte personi në restorant që sapo ishtë kthyer nga Wuhani.
“Nga ekzaminimi i mënyrave të mundshme të transmetimit, ne arritëm në përfundimin se shkaku i këtij shpërthimi ishte transmetimi i stërkalave”, thuhet në raport. “Ne arritëm në përfundimin se transmetimi i stërkalave u nxit nga ajri i kondicionuar dhe kryesisht drejtimi i rrjedhës së ajrit.”
73 klientë të tjerë që darkuan në të njëjtin kat, kishin kontakte të ngushta me pacientin e parë, por u zbulua se testimet e kryera rezultuan negative. Asnjë nga punonjësit e restorant nuk ishte infektuar.
Në raport thuhet se në kushtet e restorantit, stërkalat janë transferuar në ajër,nëpërmjet kondicionerit, që ka levizur ajrin më me forcë në drejtim të tavolinave të tjera që ndodheshin pranë. Ekipi i Guangzhou deklaroi se raporti kishte kufizime pasi ata nuk kishin kryer një studim eksperimental./ Opinion.al
