Një studim i fundit shënon një hap përpara në trajtimin e kancerit. Kështu shkruan media prestigjioze britanike BBC në një artikull, ku publikon një studim eksperimental që ka përfshirë 16 pacientë me kancere të patrajtueshme.
Çdo person kishte një trajtim të specializuar vetëm për ta, i cili synonte anët specifike të dobëta në tumorin e tyre.
Megjithatë shkruan, BBC, ende është shumë herët për të vlerësuar plotësisht efektivitetin e terapisë, e cila është e shtrenjtë dhe kërkon kohë.
Puna fokusohet në një pjesë të sistemit imunitar të quajtur qelizat T, të cilat “patrullojnë” trupin dhe inspektojnë qelizat e tjera për probleme. Ato përdorin proteina – të quajtura receptorë – për të nuhatur në mënyrë efektive shenjat e infeksionit ose qelizat devijuese që janë bërë kanceroze.
Ideja e terapisë është të rrisë nivelet e qelizave T që zbulojnë kancerin. Ato duhet t’i përshtaten çdo pacienti pasi çdo tumor është unik.
Funksionon në këtë mënyrë:
Studiuesit kërkuan gjakun e pacientit për qeliza të rralla T që kishin tashmë receptorë që mund të zbulonin kancerin.
Më pas ata morën qeliza të tjera T që nuk mund të gjenin kancerin dhe i ridizajnuan ato.
Receptorët e tyre origjinalë, të cilët mund të identifikojnë probleme ose infeksione të tjera, u zëvendësuan me ata nga qelizat T që zbulojnë kancerin. Këto qeliza T të modifikuara u vendosën përsëri te pacienti për të kërkuar tumorin.
Transformimi i qelizave T në një formë që mund të zbulojnë kancerin kërkon ndryshime të konsiderueshme gjenetike për të hequr udhëzimet gjenetike për receptorët e tyre të vjetër dhe për t’u dhënë atyre udhëzimet për të rinjtë.
Realizimi i këtyre ndryshimeve gjenetike u bë e mundur nga përparimet e jashtëzakonshme në teknologjinë e modifikimit të gjeneve Crispr, e cila vepron si një palë gërshërë molekulare – duke i lejuar shkencëtarët të manipulojnë lehtësisht ADN-në. Studiuesit që zhvilluan Crispr fituan çmimin Nobel për Kimi në 2020.
Testi përfshiu njerëz me kancer të zorrës së trashë, gjirit ose mushkërive që nuk kishin reaguar ndaj trajtimeve të tjera.
Studimi u krijua për të testuar sigurinë dhe fizibilitetin e teknologjisë dhe tregoi se qelizat e modifikuara po regonin në mënyrën e duhur.
Sëmundja vazhdoi të përkeqësohej në 11 pacientë, por u stabilizua në pesë të tjerët. Megjithatë, do të duhen studime më të mëdha për të përcaktuar dozën e saktë dhe sa efektive është me të vërtetë.
“Ky është një hap përpara në zhvillimin e një trajtimi të personalizuar për kancerin,” tha Dr Antoni Ribas, një nga studiuesit në Universitetin e Kalifornisë, Los Anxhelos, i cili testoi qasjen.
Kreu i shërbimit të imunologjisë në Clinic Hospital në Barcelonë, Dr Manel Juan tha se ishte “punë e jashtëzakonshme” dhe “padyshim një nga më të avancuarat në këtë fushë”.
