Universiteti i Lajpcigut në Gjermani bëri me dije se disa psikologë kanë zhvilluar një pyetësor shkencor me refugjatët në një qendër pritjeje të azilantëve në Lajpcig, dhe kanë vënë re se më shumë se gjysma e tyre shfaq shenja të destabilizimit psikik.
Për studimin janë anketuar 569 persona madhorë nga më shumë se 30 vende të botës, nga maji i vitit 2017 deri në qershor të këtij viti.
Më shumë se 50% e azilkërkuesve kanë shfaqur probleme psikike, një e treta e tyre ka treguar shenja të shqetësimeve posttraumatike, ndërsa një pjesë tjetër ka raportuar për simptoma si rrahje të shtuara të zemrës, shenja paniku, e të tjera.
Po ashtu tek shumë azilkërkues vërehen edhe shenjat e depresionit. Studiuesit i shohin këto rezultate të studimit si shenjë të rëndimit psikik për shumë azilantë. Sipas tyre pa një trajtim të shpejtë dhe të orientuar nga nevojat e tyre, rreziku i një përkeqësimi të shëndetit mendor tek kjo kategori është shumë i lartë./Opinion.al
