Studentja e mjekësisë Estela Nazarko e cila është njëra prej 25 të proceduarve penal nga Policia për shkak të përfshirjes saj në organizimin e protestave të studentëve tha për Fax News se lajmin e kishte marrë vesh vetëm përmes mediave.
Ajo u shpreh se protestat e studentëve janë shenja revolte, ku të qëllosh me bidona uji nuk është diçka që përbën dhunë ndaj institucioneve, ndërkohë që kjo ndodhi – shpjegon ajo, pikërisht pas orës 16:00 kohë kur mbaroi afati i ultimaatumit.
Ajo shtoi se në kohën kur policia pretendon se ka qenë prezente ajo në fakt nuk kam qenë aty.
“Organizatori i gjithë kësaj është dëshira dhe mendja jonë për t’a bërë arsimin më të mirë. Mendoj se kryeministri duhej t’i kishte plotësuar ato kërkesa, pse e ka kaq të vështirë? Është krijuar përshtypja se jemi përçarë, kjo nuk është e vërtetë. Të gjithë studentët, kudo që protestojnë janë në rrugë, kjo ka rëndësi, kemi qenë gjithmonë në rrugë por sot jemi më të flaktë,” tha studentja.
Duke folur rreth ballafaqimit të djeshëm të Ramës me studentët në Top Show, studentja tha se ata që ishin dje me kryeministrin nuk e përfaqësojnë atë.
“Unë besoj se ne jemi në rrugë dhe kërkojmë një zgjidhje. Shpresat sot i kam tek populli, më bëhet zemra mal t’i shoh studentët të bashkuar për një kauzë të drejtë dhe për këtë populli duhet t’i mbështesë. Arsimi është zemra e një populli, politikanët, gazetarët, mjekët do të ishin më të mirë në qoftë se arsimi do të ishte më i mirë.
Me këtë rast iu bëj thirrje të gjithë qytetarëve të bashkohen realisht me ne jo vetëm përmes rrjeteve sociale e komenteve nëpër kafene. Po mundohen të na përçajnë, partitë politike kanë bërë lëvizje duke infiltruar njerëzit e tyre. Por ne i qëndrojmë kauzës së studentit, sepse sot është koha jonë dhe nuk duhet t’ua lëmë partive të majta, të djathta apo të qendrës të përfitojnë nga kjo,” vijoij më tej Nazarko.
Ajo u shpreh gjithashtu se arsyeja që ka qëndruar aq fort është shpresa dhe besimi tek një frymë e pastër.
“Studentët do të presin deri në përmbushjen e kërkesave tona dhe në qoftë se nuk qëndrojmë deri në fund do të jetë një humbje. Por ne nuk do të humbim sepse do të qëndrojmë deri në fund. Mbase jemi lodhur fizikisht por shpirtërisht jemi akoma edhe më të fortë dhe të vendosur”.
Nazarko u shpreh se ka plot 6 vite që nuk e ka dashur këtë sistem arsimor dhe se sot ajo është e vendosur për t’a demostruar këtë pakënaqësi.
Kujtojmë se Estela Nazarko është studentja e cila theu “qëndrimin zyrtar” të protestës përpara pak ditësh, duke ftuar të gjithë shqiptarët në protestë përfshirë edhe ata që protestojnë tek Unaza e Re apo aktorët që protestojnë për mos prishjen eTeatrit.
Ajo e shpjegoj këtë qëndrim duke thënë se, “çfarë mjekësh do të dalin nesër nëse nuk ka arsim të mirë? Çfarë gazetarësh do të raportojnë nesër nëse nuk ka arsim të mirë. Arsimi nuk është vetëm i yni, por i të gjithëve, prandaj i ftojmë të gjithë të në bashkohen”.
