Kryeministri Edi Rama ka patur një të ftuar special në podcastin e tij të rradhës.
I ftuar ishte Gersi Troka, studenti i parë në Shqipëri me sindromën Down dhe në të njëjtën kohë kampion noti.
“Episodi i pestë i sezonit të dytë të podkastit “Flasim” ka një të ftuar special dhe një të ftuar tjetër që shoqëron të ftuarin special. Është hera e parë që kemi një të ftuar special të shoqëruar dhe them të drejtën më vjen mirë që gjendem para një personi të shoqëruar dhe unë jam i pa shoqëruar nga çunat që rrinë pranë meje kështu që mirë se erdhe, Gersi”, tha Rama.
Troka ka fituar Medaljen e Artë në Lojërat Speciale Olimpike në Berlin, për personat me aftësi ndryshe.
Duke iu përgjigjur pyetjeve të kryeministrit, 23-vjeçari thotë se arritjet e tij i ka realizuar duke punuar fort dhe duke mos u dorëzuar.
“Unë dola kampion olimpik sepse kam punuar shumë, kam bërë shumë stërvitje dhe nuk jam dorëzuar derisa u shpalla kampion noti”.
Ndër të tjera, Gersi tregoi në podcastin e kryeministrin pengun e jetës, që në të njejtën kohë u bë dhe shtysa më e madhe për të shkëlqyer në jetë.
“Që prej ikjes së babait tim nga jeta unë ndjej keqardhje sepse nuk e kam takuar kurrë. Do doja ta takoja vetëm njëherë përpara se të ikte. Por, ikja e tij u bë shtysa ime për të qenë kampion dhe për të mos u dorëzuar kurrë”, u shpreh ai./Opinion.al
