Të ftuar në studion e Fax News, dy studentët Arben Kola dhe Arlind Hoxha deklaruan se protesta e studentëve është mirëfillti politike sepse të gjitha kërkesat e tona ndaj qeverisë – thanë ata – kanë qenë që në fillim politike, pavarësisht se fillimisht është bërë një lapsus duke mos e cilësuar atë si të tillë.
Arlindi tha se, sot protesta është bërë kombëtare sepse protestuesit e “Teatrit”, “Astirit”, “Bregut të Lumit”, “Diasporës” dhe “Studentët” janë bërë bashkë kundër këtij sistemi mizerabël.
Duke folur për vendimin e djeshëm të kryeministrit për shkarkimet e disa ministrave dhe zëvendësimin e tyre me emra të rinj ai u shpreh se Rama nuk duhet të emërojë ministra që lavdërojnë kryeministrin por që bëjnë reforma.
Në këtë kuadër studentët u pyetën veçanërisht edhe për emërimin e Braçes si zv. Kryeministër ku njëri prej tyre u përgjigj me ironi: “I kemi kërkuar kryeministrit që të bëjë tarifën sa Erion Braçe jo të vërë Erion Eraçen zv. Kryeministër”.
Arben Kola tha se reagimi i studentëve gjatë përballjes me Braçen pas përfundimit të seancës plenare javën e shkuar erdhi pasi ai na provokoi. “Braçe më tha mua personalisht: ‘a ke marrë brisk me vete’, ndaj reaguam ashtu duke thënë se e duam tarifën sa Erion Braçe”.
Dje studentët vendosën përpara kryeministrit një timon makine dhe mbi të kishin vendosur librin e Kushtetutës së Shqipërisë.
Arbeni tha se, “Rama nuk e njeh fare Kushtetutën sepse ai refuzoi protestën e diasporës dhe lejoi ekstremistët grekë të bëjnë protesta nacionaliste. Ta lexoje mirë dhe t’a shqyrtojë mirë. Sepse në qoftë se ai zbaton Kushtetutën gjithçka do të shkojë mirë në këtë vend”.
Arbeni iu drejtua Edi Ramës duke thënë: “Kryeministri ka deklaruar se do ta kap edhe këtë protestë siç kam kapur shumë të tjera, por të jesh i bindur z. kryeministër që ti nuk do mund t’ia dalësh që të marrësh diçka nga kjo protestë. Ndërhyrjet e politikës në protestë janë lojra për të prekur pastërtinë e saj por nuk do t’ia dalin.
Protesta do të jetë gjithmonë e studentëvee me zemër dhe e shqiptarëve me zemër. Ai uli 7% tarifën për bizneset e mëdha dhe thotë që nuk ka buxhet për realizimin e e kërkesave të studentëve. Ai është një Tartuf, është gjithashtu si një perandor i Romës së Lashtë që i vuri flakën Romës dhe kur e rrethuan për t’a vrarë tha pse po më vrisni, po humbisni shumë”.
Studentët u shprehën se në qoftë se do të kemi rrëzimin e ligjit për arsimin e lartë dhe plotësimin e 8 pikave, do ta ndalojnë protestën dhe do të kthehen në auditore.
Lidhur me protestën e mbrëmshme ata u thanë se shikuan një nga protestat më patriote që kanë parë ndonjëherë. “Morëm një mesazh shumë të madh sepse shqiptarët u bashkuan rreth flamurit kombëtar”.
