Studentët me rezultatet më të larta në Universitetin Teknik të Stambollit për vitin 2019-20 janë shqiptarë. Jo vetëm dy apo tre të parët por tetë vendet e para janë studentë shqiptarë.
Në listën e shpallur së fundmi të të diplomuarve në Universitetin Teknik të Stambollit, janë shpallur kësaj here 4 vende të para, 2 të dytë dhe një i tretë.
Katër të parët me notën mesatare 3.99 janë: Emiljo Mëhillaj në degën Inxhinieri Elektronike dhe Telekomunikacioni; Bianka Pajo në degën Inxhinieri Ndërtimi si edhe Sigela Muharremi dhe Alueda Kuka në degën e Ekonomisë.
Ndërkohë, të dytët e universitetit janë shpallur Arlind Billa në degën Inxhinieri Elektronike dhe Telekomunikacioni dhe Xhoela Bame në degën Biologji Molekulare dhe Gjenetike me notë mesatare 3.96.
Vendin e tretë e mori Alket Çiku në degën Inxhinieri Ndërtimi me mesatare 3.94.
Autoriteteve të universitetit u ka bërë përshtypje fakti se tetë të parët e këtij viti ishin shqiptarë, ndërsa po ashtu, e para e vitit të kaluar ishte sërish një shqiptare dhe pikërisht Ida Gjergji.
Universiteti Teknik i Stambollit është universiteti i tretë më i vjetër teknik në botë kushtuar shkencave inxhinierike, si dhe shkencave shoqërore kohët e fundit, dhe është një nga institucionet arsimore më të spikatur në Turqi. ITU është renditur në vendin e 173-të në të gjithë botën (i pari në Turqi) në fushën e “Inxhinierisë dhe Teknologjisë”, dhe 307-i në të gjithë botën (i pari në Turqi) në fushën e “Shkencave Natyrore”.
Pranimi në universitet është konkurrues, dhe në pjesën më të madhe të departamenteve hyjnë 1% e afro 2 milion aplikantëve. Të diplomuar të shumtë janë bërë gjithashtu anëtarë të akademisë së shkencave në ShBA, Britani dhe Rusia./ Opinion.al
