Studentët me anë të një letre i kanë drejtuar 4 kërkesa Ministrisë së Arsimit, që sipas tyre duhet të plotësohen deri nesër në orën 16:00 pasdite.
Në kërkesën e përgatitur nga Këshillat Studentorë të Universiteteve Publike, thuhet se “Studenti, i cilësuar në bazë të rregullores së institucionit të arsimit të lartë publik si përsëritës në një lëndë apo në shumë lëndë dhe vijon studimet në vitin pasardhës, i nënshtrohet tarifës së shkollimit për kredit për detyrimet apo lëndët përsëritëse, si dhe tarifës vjetore të shkollimit të vitit akademik në të cilin vazhdon studimet”.
Studentët e të gjitha universiteteve publike kane paralajmëruar se do bojkotojnë edhe nesër mësimin duke u grumbulluar në oborret e fakulteteve përkatëse për të marshuar në orën 10:00 drejt Ministrisë së Arsimit.
Çfarë kërkojnë studentët?
Studentët ndjehen të mashtruar nga Qeveria. Sipas tyre, ‘hileja’ qëndron tek tarifat për kreditet, që në disa fakultete shkojnë deri në 670 lek të reja për kredit. Lëndë të ndryshme kanë kredite të ndryshme, në varësi të programit. Lëndët që konsiderohen dytësore, zakonisht vlerësohen me tre kredite. Por, ka lëndë që shkojnë edhe në 8 kredite. Me një llogari të thjeshtë, nëse një student nuk kalon në herën e parë provimin e një lënde me 8 kredite, kur të hyjë në provim për herë të dytë duhet të paguajë rreth 5500 lekë të reja dhe nuk përfundon këtu.
Nëse nuk e merr as herën e dytë, herën e tretë kjo pagesë dyfishohet dhe shkon mbi 100 mijë lek.
Nisur nga revolta kundër tarifave për kreditet, studentët kërkojnë tani edhe përgjysmimin e tarifës së shkollimit. Në fakt, sipas ligjit për arsimin e lartë, që në momentin kur një i ri lë bankat e shkollës së mesme dhe është kandidat për student, e deri në momentin kur ai mbyll studimet, duhet të paguajë plot pesë tarifa.
Tarifa e parë quhet “tarifë aplikimi” dhe në varësi të universiteteve dhe të fakulteteve ajo varion në shumë të ndryshme. Sipas ligjit, kjo tarifë paguhet nga studenti në momentin që aplikon për të studiuar në një degë të caktuar.
Tarifa e dytë është tarifa e konkurrimit. Këtu studenti duhet të paguajë për të marrë pjesë në konkurrimin pranë universitetit në rastet kur universiteti në fjalë parashikon zhvillimin e konkursit.
Me t’u shpallur fitues, tarifa e radhës është ajo e regjistrimit. Përgjithësisht kjo tarifë ka qenë e unifikuar në degët e Universitetit të Tiranës dhe paguhet në momentin që i riu i shpallur fitues regjistrohet për të ndjekur studimet në degën e fituar.
Pas tarifës së regjistrimit mbërrin tarifa e shkollimit. Kjo është pagesa që studenti kryen për ndjekjen e studimeve përgjatë një viti akademik. Pra, kjo tarifë paguhet çdo vit. Në fund është tarifa e studimit, që është një shumatore mes tarifës së regjistrimit dhe tarifës së shkollimit.
