Studentët e mjekësisë janë paraqitur ditën e sotme ashtu siç e kishin lajmëruar para rektoratit të UMT-s, duke protestuar për të kundërshtuar draftin për të lidhur kontratë pune në Shqipëri pas përfundimit të studimeve
Gjatë deklaratave për mediat, studentët thonë që janë kundër punësimit me detyrim.
Njëri nga ata thekson se nuk ka pse të ndihen të kushtëzuar se ku duan t’i vazhdojnë studimet apo se ku duan të punojnë.
“Ne nuk duam të ndihemi të kushtëzuar, e vendosim vetë se çfarë do bëjmë me jetën tonë. Ne duam të rrimë këtu, të ikim jashtë, është puna jonë dhe askush tjetër.
Tarifa 5 mijë euro është marramendëse. Ne do jemi gjithnjë kundra dhe nuk ndalemi nga protestat”, tha studenti.
Ndërkohë sipas një tjetër studenti, theksohet se ata janë të lirë të bëjnë zgjedhjen e tyre pas studimeve brenda apo jashtë vendit për të vazhduar karrierën e tyre dhe kërkojnë që të mos ju imponohet me detyrim punësimi.
“Ministria e Arsimit dhe e Shëndetësisë na kanë paraqitur planin për të ndaluar ikjen e mjekëve. Në fillim kjo ide u paraqit si një draft, por vetëm pas reagimit tonë masiv, kjo gjë që u përgënjeshtrua dhe na u tha që është në nivel propozimi. Jemi kundër kësaj ideje, për fenomenin e largimit. Detyrimi për të punuar në vend nuk është zgjidhja e duhur. Detyrimi në një formë apo një tjetër i mjekëve bie ndesh me parimet demokratike. Një vend si Shqipëria nuk mund të veprojë në një formë të tillë”, tha një tjetër studente./Opinion.al
