Disa ditë pas operacionit policor të koduar “Pika2”, ku kanë rënë në pranga disa zyrtarë të policisë kufitare në Morinë, duket se puna i është kthyer normalitetit. E gjithë struktura policore e kësaj pike është zëvendësuar pas korrupsionit të zbuluar ku nga përgjimet rezultoi se policët, merrnin ryshfete dhe kalonin shtetasit në doganë pa u regjistruar në sistemin TIMS.
Të gjitha këto bëheshin për 60-70 euro për person. Ndërsa shumat deri në 400 euro ishin për kontrabandën e mallrave.
Ndërkohë sot bëhet e ditur se efektivët e pezulluar dhe të arrestuar janë zëvendësuar menjëherë pas përfundimit të operacionit të përbashkët të strukturave ligjzbatuese të Shqipërisë dhe Kosovës.
Aktualisht po punohet me 6 sportele dhe vijojnë kontrollet rutinë të mjeteve dhe qytetareve që hyjnë në territorin e Shqipërisë, ndërkohë që me rritjen e temperaturave pritet që gjatë fundjavës të ketë fluks të shtuar të lëvizjes së qytetarëve.
34 persona u hetuan si pjesë e procedimit penal, 32 prej të cilëve punonjës të Policisë Kufitare në Kukës. Ata dyshohen nga SPAK si të përfshirë në shpërdorim detyre dhe korrupsion.
Ditën e djeshme Gjykata vendosi edhe masat e sigurisë, për 15 persona u dha masa arrest në burg, për 14 të tjerë ajo e arrestit në shtëpi, ndërsa për pjesën e mbetur, pezullim nga detyra.
