Studimet rreth koronavirusit të ri vijojnë, jo vetëm për gjetjen e një vaksine por edhe për monitorimin e tij. Si çdo virus, ai ka aftësinë të pësojë ndryshime (mutacione), të cilat modifikojnë karakteristikat e tij, që nga transmetueshmëria e deri tek mënyra se si ai infekton qelizat tek njerëzit.
Shifrat e të prekurve janë në rritje çdo ditë, që do të thotë se virusi nuk e ka humbur aftësinë për tu transmetuar. Ky fakt mbështetet edhe nga studimi i fundit i grupit kërkimor të Qendrës Spitalore Universitare Vall d’Hebron në Barcelonë. Por të dhënat japin edhe një lajm të mirë.
Studimi i sjellë nga epidemiologu, Dr. Ilir Alimehmeti, sugjeron se virusi ka pësuar mutacion por jo duke u bërë më agresiv në infektim.
Artikulli është publikuar më 5 gusht 2020 në revistën prestigjioze Emerging Microbes & Infections. Sipas tij mekanizmi që ka ndryshuar tek virusit, bën të mundur infektimin e një numri më të vogël qelizash humane dhe me një ritëm më të ngadaltë, duke sjellë si rrjedhojë edhe një infeksion më të lehtë, por pa humbur aftësinë e transmetueshmërisë.
Sipas autorëve, kjo ka ardhur për arsye se virusi kërkon të mbijetojë, duke mos u bërë kështu vdekjeprurës për bartësin në një periudhë të shkurtër kohore, por duke garantuar që të mbijetojë tek qelizat humane deri sa të ketë mundësi të transmetohet tek të tjerë.
POSTIMI I PLOTE
“Djalli ndodhet në detaje, por po aty ndodhet edhe shpëtimi!”
Cit.: Hyman G. Rickover
Të tjera mutacione/lajme të mira të virusit miqtë e mi!
Një tjetër superpunim hedh dritë mbi mutacionet e mundshme “zbutëse” të SARS-CoV-2.
Kujtoj që virusi u bë i aftë të infektojë njerëzit përmes një mutacioni në zonën që kodon proteinën S (spike), ku potencialisht u shtua (insercion) një sekuencë P-R-R-A (prolinë-argininë-argininë-alaninë).
Punuar nga grupi kërkimor i Qendrës Spitalore Universitare Vall d’Hebron – Barcelonë, artikulli është publikuar më 5 gusht 2020 në revistën prestigjioze Emerging Microbes & Infections. (linku në fund të postimit)
Në studimin e tyre shumë teknik, autorët kanë hulumtuar speciet e virusit në 18 pacientë me COVID-19:
10 me COVID-19 të lehtë
8 me COVID-19 të rëndë.
Në total janë kryer:
48.746.647 lexime (81.202 – 597.558 lexime për çdo amplikon)
3.749.742 gjene të plota S
208.319 lexime për çdo pacient, mesatarisht
REZULTATE:
Fshirjet (delecionet) nuk kanë ndodhur në mënyrë rastësore përgjatë gjenit S, por janë grumbulluar në rajone specifike.
Ndër mutacionet e ndryshme, një rezultat shumë mbresëlënës kishte grumbullimi i fshirjeve (“hot-spot”) në amplikonin N07 në 14 pacientë ndër 18 (78%).
Ndër këta 14 pacientë ndodheshin 100% e pacientëve me COVID-19 të lehtë dhe vetëm gjysma e atyre me COVID-19 të rëndë.
Variantet virale me këto fshirje (delecione) ishin në mënyrë sinjifikante më të shpeshta te pacientët me COVID-19 të lehtë. (Fisher test: OR: 95%CI 0.0 – 0.9605; p=0.023)
KONKLUZIONE:
Këto gjetje sugjerojnë se delecionet nuk janë evente sporadike edhe pse vërehen në një përqindje relativisht të vogël të kuazispecieve virale.
Prezenca e këtyre mutacioneve dhe krijimi i një kodoni “stop” sugjerojnë se nënnjësia S1 e proteinës S (spike) mund të prodhohet si “proteinë e lirë” (free S1) hidrofilike.
Si rrjedhojë, kjo “free S1” mund të lidhet me receptorët ACE2 në mënyrë konkuruese, duke bllokuar receptorët dhe duke penguar lidhjen e viruseve të plota funksionale.
Ky mekanizëm bën të mundur infektimin e një numri më të vogël qelizash humane dhe me një ritëm më të ngadaltë, duke sjellë si rrjedhojë edhe një infeksion më të lehtë, por pa humbur aftësinë e transmetueshmërisë.
Autorët dalin në konkluzion se:
PËRZGJEDHJA NATYRORE KA FAVORIZUAR NJË STRATEGJI TË TIPIT “MOS E DIGJ SHTËPINË KU JETON”.
Pas çdo specie të sotme, ndodhen miliona vite evolucioni natyror!
Natyra ka qenë dhe do të jetë gjithmonë aleati ynë më i mirë!
Ndërkohë të fitojmë kohë duke respektuar masat dhe përkujdesjet individuale dhe sociale.
Dr. Shk. Ilir Alimehmeti
Epidemiolog Klinik
Fakulteti i Mjekësisë, UMT
Për detaje:
https://www.tandfonline.com/…/full/10…/22221751.2020.1806735
/Opinion.al
