Kishte rrezikuar të bënte një figurë të keqe në rastin e traversës së goditur nga Higuain, por ndërkohë e ka mbyllur në mënyrën më të bukur të mundshme atë mbrëmje laziale, duke pritur penalltinë deçizive ndaj Dybala, në fitoren ndaj Juventus, për tu shndërruar në heroin e Lazios. Në fitoren bardhekaltër kundër Juventus, nuk ishte vendimtare vetëm dopieta e Ciro Immobile, por edhe dorashkat e Thomas Strakosha, portieri 22-vjeçar i përfaqësueses së Shqipërisë, i rritur në Greqi, te Panionios dhe i mbërritur në Itali në moshën 17-vjeçare, falë nuhatjes së Igli Tare, por edhe miqësisë së drejtuesit lazial me babain e Thomas, legjendën e portës së Shqipërisë, Foto Strakosha.
Më parë në hije për shkak të Marchetti dhe Vargic, djaloshi shqiptar ishte protagonist me ekipin U-19 të Lazio, përpara se të fitonte fanellën e titullarit, madje duke kaluar fillimisht edhe te Salernitana, një tjetër klub në pronësi të presidentit Lotito. Një transferim i rëndësishëm për djaloshin, i cili u rikthye në bazë në verën e vitit 2016 u lançua nga Simone Inzaghi me rastin e transfertës së Milanos, të sezonit të kaluar, kur Marchetti ishte viktimë e një problemi në pulpë gjatë nxehmjes. Që nga ajo mbrëmje, fati i Strakoshës ndryshoi përgjithmonë.
I shndërruar ndërkohë edhe si zëvendësues i Etrit Berishës, të cilin e zëvendësoi në përfaqësuesen shqiptare me rastin e ndeshjes ndaj Italisë, gjatë marsit të kaluar, numri 1 i portës së Lazios ka rinovuar me klubin nga Roma deri në vitin 2022 për një pagesë prej 600 mijë euro në sezon, pasi fitoi besimin e të gjithë ambientit kryeqytetas dhe fanellën e titullarit. Një gur i çmuar shkëlqyes, që ka rritur vlerën e tij konsiderueshëm në merkato, aktualisht në kuotën rreth 5 milionë euro, për të kënaqur krerët e Lazios, të cilët me pak para kanë mundur të sigurojnë një portier me vlerë absolute.
