Sezonin e kaluar emisioni investigativ “STOP” transmetoi rastin korruptiv të zyrtares së ASHR-së, (Autoriteti Shëndetësor Rajonal) Raimonda Kadra, Drejtoreshë e Kujdesit Shëndetësor në këtë institucion.
Në çertifikatën e saj të lindjes thuhej se i përkiste datës 14.04.1955, ndërsa në letrat e dorëzuara në institucionin ku ajo punonte, viti i lindjes rezultonte 1957.
E pyetur nga gazetarja e emisionit lidhur me moshën e saj, ajo refuzoi të jepte një përgjigje, duke i’u shmangur edhe kameras, me pretekstin se nuk mund të jepte intervistë pa marrë leje në Ministri.
Për këtë rast “STOP” siguroi dokumentet zyrtare, ku vërtetonin se zonja në fjalë kishte falsifikuar vitin e lindjes së saj me qëllim qëndrimin në punë dhe mosdaljen në pension.
Por, përveç kësaj, stafi i emisionit pas një hetimi siguroi edhe disa kontrata pune, plot 15 të tilla, kur rezultonte se Raimonda Kadra ishte e dypunësuar në të njëjtin sektor në shtet dhe në privat.
Kjo drejtoreshë ofronte shërbimin e saj kundrejt pagës edhe në disa subjekte private, të cilat “STOP” i dokumentoi të gjitha me fakte.
Por çfarë ndodh sot pas këtij denoncimi?
Edhe pse nga Drejtoria e këtij institucioni i ishte kërkuar Ministrisë së Shëndetësisë të pezullohej dhe të shkarkohej zonja Kadra, kjo ministri e hodhi poshtë.
E si të mos mjaftonte kjo, Drejtoria e këtij institucioni e çoi edhe në Prokurori një kallëzim penal ndaj Kadrës, por edhe kjo e fundit e hodhi poshtë.
Aktualisht Raimonda Kadra vazhdon punën normalisht!/tvklan.al
