Sekretari i Përgjithshëm i NATO-s, Jens Stoltenberg gjatë një konference shtypi në Bruksel tha se hetimi për sulmin me raketa në Poloni është duke vijuar. Ai tha se nuk kishte “asnjë tregues se ky ishte rezultat i një sulmi të qëllimshëm”.
Stoltenberg thotë: “Analiza jonë paraprake sugjeron se incidenti ka të ngjarë të jetë shkaktuar nga një raketë e mbrojtjes ajrore ukrainase e lëshuar për të mbrojtur territorin ukrainas kundër sulmeve me raketa ruse.
“Por më lejoni të jem i qartë, ky nuk është faji i Ukrainës. Rusia mban përgjegjësinë përfundimtare ndërsa vazhdon luftën e saj të paligjshme kundër Ukrainës.”
Shefi i NATO-s thotë se aleatët në aleancën e mbrojtjes kanë ofruar ngushëllimet e tyre për humbjen e jetëve, ndërsa shtoi se shprehin solidaritet me Poloninë.
“NATO qëndron e bashkuar dhe ne gjithmonë do të bëjmë atë që është e nevojshme për të mbrojtur të gjithë aleatët”, shton Stoltenberg.
Duke folur nëse Evropa do të forcojë mbrojtjen e saj ajrore pas sulmeve, ai shton se “NATO ka rritur ndjeshëm” praninë e saj në pjesën lindore të Evropës.
I pyetur nëse incidenti në Poloni mbrëmë ishte momenti “më intensiv” që NATO kishte përjetuar deri më tani në mes të luftës në Ukrainë, ai thotë: “Unë jam gjithmonë i kujdesshëm për të renditur incidente të ndryshme.”/Opinion.al
