Ish-strategjisti i Donald Trump, Steve Bannon ka dhënë dorëheqjen nga Kompania Mediatike Breitbart News, ku ai ndërtoi dhe reputacionin e tij.
Largimi i tij vjen në një moment kur në SHBA ka shpërthyer debati për librin ‘Zjarr dhe tërbim’, si dhe në një kohë kur Bannon vet mbetet i paaftë për të shuar furinë e shkaktuar pas deklaratave që iu atribuuan atij në librin e ri që vë në dyshim gjendjen mendore të presidentit Trump, si dhe diskreditimi që i bëri djalit të tij më të madh, Donald Trump Jr.
Bannon ishte një nga ndihmësit më të besueshëm të presidentit Trump.
Ai u largua nga posti verën e kaluar pas një lufte për pushtet brenda stafit të Donald Trump në Shtëpinë e Bardhë.
Bannon dhe “Breitbart” do të punojnë së bashku për një tranzicion të butë, thuhet në deklaratën e publikuar nga shefi ekzekutiv i kompanisë, Larry Solov.
Në deklaratën e tij, Bannon thekson se ka qenë “krenar për atë që ka arritur ekipi i Breitbartit, në një periudhë afatshkurtër, pikërisht në krijimin e një platforme mediatike të klasit botëror”.
