Stefi Prifti, si rrallë herë ka rrëfyer historinë e njohjes me bashkëshorten e tij të ndjerë Marina.
Në news 24 ai rrëfeu se ata janë njohur kur ishin ende studentë, ajo studionte gjuhë-letërsi ndërkohë që ai ishte student i Institutit të Lartë të Arteve.
Takimi i parë i tyre ka qenë në Qytetin Studenti, ku në pallatin studenti zhvilloheshin aktivitete të ndryshme kulturore.
Ai rrëfeu se edhe Marina e donte shumë muzikën ndaj kishte shkuar aty së bashku me dy mikeshat e veta, ndërkohë që Stefi performonte me “Grupin Studenti” dhe ishte këngëtari kryesor për 2 vjet. Sipas Stefit, gjithçka nisi nga një bisedë rastësore, dhe që më pas u kthye në një dashuri të madhe.
Më vonë ata emigruan në Greqi, ku vitet e para ishin të vështira. Fryt i dashurisë së tyre janë dy vajzat, ndërsa Stefi thekson se kanë qenë një familje e lumtur dhe kanë kaluar shumë mirë.
Ndërkohë kanë kaluar 6 vite që nga largimi i bashkëshortes së tij nga jeta, dhe për Stefin këto kanë qenë vite shumë të vështira, “Vite me një mbingarkesë dhe me një peshë të madhe mbi supe, për të cilat duhet të përgjigjesha edhe pse nuk isha i përgatitur. Sëmundja erdhi krejt papritur dhe e mori shumë shpejt”.
Mes emocioneve ai tha se i është dashur t’u qëndrojë pranë vajzave të tij, dhe mendon se ia ka dalë. Më tej shtoi se i është dashur të bëhet edhe nënë edhe babë. “Por një burrë nuk mund të bëhet dot kurrë nënë”, tha ai.
