Ministri i Drejtësisë i Turqisë, Bekir Bozdag, ka zbuluar detaje të tjera nga sulmi me bombë në sheshin Taksim të Stambollit, ku deri më tani raportohet se 6 persona kanë humbur jetën, ndërsa 81 të tjerë kanë mbetur të plagosur.
Ministri Bozdag tha se gruaja që dyshohet se shpërtheu bombën, u ul në një stol, priti 45 minuta para se të ngrihej dhe më pas bomba shpërtheu.
“Një grua ulet në një stol për rreth 45 minuta dhe shpërthimi ndodh menjëherë pasi ajo ngrihet”, tha ministri turk i Drejtësisë.
Ai po ashtu, i bëri thirrje qytetarëve që mos të bien pre e lajmeve të pavërteta lidhur me sulmin, ndërsa shtoi se prokuroria e Përgjithshme e Stambollit ka nisur një hetim lidhur me çështjen.
“Shumë lajme provokuese po qarkullojnë. Është e dobishme për qytetarët që të mos mbështeten në lajme joekzistente që synojnë të mashtrojnë. Prokuroria e Përgjithshme e Stambollit ka nisur një hetim. Autorët e kësaj ngjarje natyrisht janë përgjegjës. Ky është një sulm kundër besueshmërisë, paqes dhe unitetit të Turqisë”, tha ai./Opinion.al
