Një tentativë e pastër spiunazhi ka ndodhur dje gjatë përgatitjeve të Partizanit në kompleksin “Tirana Internacional” në Pezë.
Kundërshtari i parë i të kuqve për fazën e tretë është Luftëtari. Gjirokastritët dje kanë qenë në kryeqytet për të zhvilluar një miqësore me Tiranën, por ata kanë preferuar që me këtë rrugë të kryejnë dy misione.
Kështu, zv.trajneri i Luftëtarit, Marko Jovanoviç, dhe zëdhënësi i klubit, Rigels Malile, ishin ngarkuar që të ndiqnin përgatitjet e Partizanit, i cili do të zhvillonte një ndeshje brenda grupit. Dy emisarët miq kanë mbërritur në Pezë me një taksi dhe për të mos rënë në sy u sistemuan në një cep të kompleksit. Jovanoviç kishte ardhur “i armatosur” për ta kryer sa më mirë misionin, ku në dorë mbante një bllok ku do të hidhte shënimet.
Zv.trajneri serb dhe zëdhënësi Malile mbërritën rreth 30 minuta para fillimit të seancës së “demave”. Gjatë kësaj kohe, ata preferuan që të shikojnë në fushën tjetër të kompleksit ndeshjen miqësore, Kukësi-Kukësi B. Sapo të kuqtë zbritën në fushë dhe nisën të bëjnë nxehje individuale, dy përfaqësuesit e Luftëtarit ndryshuan objektiv dhe u kthyen nga fusha ku ndodhej Partizani.
Trajneri Sulejman Starova dhe pjesëtarët e tjerë të stafit u vunë në dijeni para fillimit të seancës për praninë e “spiunëve” të Luftëtarit. Para fillimit të përgatitjeve, ku ishte planifikuar edhe një ndeshje kontrolli brenda grupit, stafi teknik me në krye trajnerin Starova u dha urdhër punonjëse të kompleksit që të zbraznin tribunën e stadiumit. Aty ndodheshin edhe dy përfaqësuesit e Luftëtarit.
Motivi i këtij vendimi ishte: Stërvitje me dyer të mbyllura (ndonëse bëhet fjalë për një ambient që i ka dy anësore të hapura). Të zënë të papërgatitur, zv.trajneri Jovanoviç dhe zëdhënësi Malile kalojnë në tribunën e fushës tjetër dhe të imponuar shikojnë miqësoren e Kukësit me ekipin. Pas disa kohësh, dy përfaqësuesit e Luftëtarit akomodohen paranë lokalit të kompleksit, ku kishin një kënd shikimi te fusha.
Gjirokastritët, me sa duket, e morën vesh që janë zbuluar dhe zv.trajneri Jovanoviç mori një kafe e një shishe ujë dhe ndoqi për disa minuta ndeshjen e Partizanit. Aty ata u takuan edhe me ish-trajnerin e Luftëtarit, Gerd Haxhiu, i cili si trajner i Korabit ishte në Pezë, pasi kishte një miqësore me Shënkollin. Duke parë që u zbuluan nga të gjitha anët, zv.trajneri serb dhe zëdhënësi Malile u larguan nga Peza përpara se të niste pjesa e dytë e ndeshjes së kontrollit të Partizanit.
