Lutfi Çekiri është 53-vjeçari i cili humbi jetën pasi nuk u ndihmua nga mjekët QSUT dhe Spitali Ushtarak, duke e “sorollatur” sa në një spital në tjetrin.
Ai dha dhe një intervistë për mediat ku foli për përkeqësimin e shëndetit të tij, por ministria e Shëndetësisë nuk bëri asnjë reagim, gjë e cila rezultoi fatale për 53-vjeçarin.
Por, pas vdekjes së tij, mësohet se ministria ka ngritur një grup pune që po heton dy spitalet në vendin tonë. Një informacion i tillë është konfirmuar zyrtarisht edhe nga Ministria e Shëndetësisë.
“Ministria e Shëndetësisë dhe Mbrojtjes Sociale ka ngritur një grup pune për të verifikuar procedurat e ndjekura në strukturat spitalore për pacientin me inicialet L.Ç, 53 vjeç, që ndërroi jetë në QSUT. Duke i shprehur ngushëllimet familjarëve, Ministria e Shëndetesise siguron se do të kryhet hetimi i plotë administrativ për procedurat e ndjekura nga strukturat spitalore. Ministria e Shëndetësisë dhe Mbrojtjes Sociale siguron qytetarët se shërbimi mjekësor është në gatishmëri për të ofruar jo vetëm urgjencat 24/7, por të gjitha shërbimet e nevojshme për qytetarët në të gjitha nivelet e kujdesit mjekësor”,-thuhet në njoftimin zyrtar të Ministrisë së Shëndetësisë.
Nuk dihet se çfarë do të zbulohet nga hetimet që pretendon ministria se do të kryen në dy spitale, por nëse ministria e Shëndetësisë do të kishte reaguar pak ditë më parë, ndoshta Lutfi Çekiri nuk do të kishte humbur jetën./ Opinion.al
