Komisioni i Monitorimit të AP të Këshillit të Europës zhvilloi mbledhjen në sallën e seancave plenare të Kuvendit të Shqipërisë.
Në mbledhjen e komisionit Kryetarja e Kuvendit të Shqipërisë, Elisa Spiropali falenderoi Këshillin e Europës për heqjen e Shqipërisë nga lista e shteteve anëtare në monitorim dhe vendosjen në proces post-monitorimi.
Gjatë fjalës së saj ajo rikonfirmoi angazhimin e Kuvendit për të udhëhequr procesin e reformave dhe progresin e Shqipërisë në respektimin e detyrimeve dhe angazhimeve që burojnë nga ky status i ri në organizatën prestigjioze të Këshillit të Europës.
“Çështjet kryesore që e kanë mbajtur Shqipërinë me status nën monitorim të plotë nga AP e KiE kanë qenë Reforma gjithëpërfshirëse në Drejtësi, Lufta kundër Korrupsionit, Reforma Administrativo-Territoriale, Ligji për Mbrojtjen e Pakicave, Reforma Zgjedhore, Liria e Medias, Reforma në Administratën Publike. Progresi i dukshëm i Reformës në Drejtësi, vlerësimi nga MONEYVAL në tetor të vitit 2023 dhe vendimi për ta hequr Shqipërinë nga lista e shtuar nën monitorim, ligji i vitit 2017 për pakicat dhe reforma administrative e vitit 2014 ishin disa nga elementët thelbësorë që çuan në vendimin pozitiv të prillit 2024 për ta kaluar Shqipërinë në fazën post monitorim të AP KiE.
Falë reformave që ka ndërmarrë Shqipëria, nën drejtimin e Kryeministrit Rama, ajo ka treguar një përparim të qëndrueshëm në adresimin e rekomandimeve në pritje të raporteve të miratuara nga ky komision dhe Asambleja Parlamentare. Këshilli i Evropës vijon të kontribuojë në promovimin e demokracisë, të drejtave të njeriut dhe sundimit të ligjit në Shqipëri dhe vendet e tjera të Ballkanit Perëndimor. Sot Shqipëria po ecën me ritmet më të shpejta se të gjitha vendet e rajonit drejt integrimit europian dhe ne kemi përcaktuar si prioritet strategjik kombëtar anëtarësimin në Bashkimin Europian brenda vitit 2030. Shqipëria është e vendosur në destinacionin e saj dhe ka vetëm një plan A për të ardhmen e vet: anëtarësimin në Bashkimin Europian.
Realizimi i këtij objektivi, si prioriteti numër një i Kuvendit të Shqipërisë, ka shtruar para nesh detyra të reja, të cilat burojnë edhe nga ligji i ri mbi rolin e Kuvendit në procesin e anëtarësimit, përfshirë ndryshimet në këtë ligj në mars 2023, të cilat synojnë që Kuvendi t’u përgjigjet më mirë nevojave dhe sfidave të procesit të negociatave. Ky kontribut është një vlerë e shtuar në përpjekjen e vendeve tona për t’u anëtarësuar në Bashkimin Europian, pavarësisht shpejtësive të ndryshme me të cilat vendet e rajonit po ecin drejt këtij qëllimi.
Ky moment pozitiv për Shqipërinë duhet parë me pozitivitet nga Këshilli i Europës, por edhe nga vendet e tjera të rajonit. Angazhimi ynë për të respektuar vlerat dhe standardet e Këshillit të Evropës, është pjesë e aspiratave tona për tiu bashkuar familjes europiane. Dialogu dhe shkëmbimi i përvojave me shtetet anëtare të Këshillit të Europës për të forcuar institucionet demokratike dhe konsoliduar vlerat demokratike në shoqërinë shqiptare është një ndihmë e madhe për ne. Arritjet e Shqipërisë në respektimin e detyrimeve dhe angazhimeve si vend anëtar janë të qarta, të dukshme dhe të matshme.
Reforma në drejtesi, me synimin për të garantuar pavarësinë e saj të vërtetë dhe administrimin efikas të drejtësisë, lufta kundër korrupsionit dhe pastrimit të parave, reforma administrativo-territoriale, ligji për Pakicat Kombëtare, për të përmendur vetëm disa, kanë qenë thelbësore në progresin tonë. Ndërsa shohim drejt të ardhmes, mbetemi të angazhuar për ta vijuar këtë punë të mirë. Puna e këtij komisioni është thelbësore për të garantuar që ne të ruajmë parimet dhe standardet që përcaktojnë vlerat tona të përbashkëta evropiane. Jam e bindur që do të çojmë më tej progresin e deritanishëm, duke përkrahur një Shqipëri më të fortë, më demokratike, që kontribuon për stabilitetin dhe paqen e rajonit dhe të Evropës”, u shpreh Spiropali.
