Ministrja për Marrëdhënien me Kuvendin, Elisa Spiropali e ka quajtur një karikaturë, pjesën e protestës së mbetur të studentëve sipas të saj në fakultete.
Spiropali u shpreh se segmentet e studentëve që nuk duan mësim, ushqehen nga Partia Demokratike, LSI dhe Berisha.
“Kuadri ligjor e bën të pamundur që t’u gjendemi, por kemi vullnetin më të mirë për të dialoguar me aktorët e faktorët për një zgjidhje në të drejtë të studentëve. Tanimë nuk kemi të bëjmë më me protestë të studentëve, ajo që ishte protesta i hap rrugë paktit për universitetin dhe plotësimit të kërkesave, ulje të tarifave, por mbi të gjithave një transformim të infrastrukturës universitare, partneritet mes ministrive dhe fakulteteve që kanë lidhje me to, punësimin e të rinjve me rezultateve më të mira, përkthimin e titujve botërorë dhe standard për titujt”.
Sipas Spiropalit: “Ajo që ka mbetur është një karikaturë e protestës dhe angazhimin e PD, LSI dhe vetë Sali Berishës, që është i angazhuar me disa segmente të vogla brenda universitetit të ushqyer me tituj të pamerituara dhe punësim të paturpshëm aty ku kanë rrjetet nepotike militante dhe klanore”. D.L
