Ministrja e Shtetit për Marrëdhëniet me Parlamentin, Elisa Spiropali, tha se akuzat e opozitës për fshehje të viktimave të COVID janë të turpshme ndërsa “thumboi” kryetarin e PD, Lulzim Basha duke thënë se të vdekurit nuk janë kaseta që mund të fshihen.
“Nuk mund të mos jap një përgjigje për akuzën e rëndë se të vdekurit po fshihen. Të vdekurit nuk janë kaseta, nuk mund të fshihen. Në fillim të pandemisë thonin se po shtohen të vdekurit për të marrë fonde nga BE, tani në mënyrë të turpshme po thonë se po i fshehim. Kjo është paturpësi. Fotot që dolën nga morgu ishin skenar i përgatitur, i paralajmëruar. Cila opozitë në botë nxjerr foto nga morgu në një situatë të tillë, kur njerëzit janë të ngarkuar psikologjikisht. Shkuan deri aty sa kërcënuan se do ta cojnë në Prokurori, po le të shkojnë në Prokurori. Janë aty për të bërë luftë për karrige, por nuk merret pushteti me dhunë. T’i lëmë të vdekurit të prehen, t’i lëmë familjarët të qetësohen, ne do të vazhdojmë punët tona dhe të gjithë bashkë do ja dalim. Është një kohë për të reflektuar që politika nuk mund ta bëjë shoqërinë copa”, tha Spiropali.
Në fjalën e saj, ministrja Spiropali rikujtoi edhe tragjedinë e një viti më parë dhe kritikoi opozitën për qëndrimet e mbajtuara që sipas saj ishin jo dinjitoze.
“Sot në 1-vjetorin e tërmetit tragjik, nuk mund të mos ndjejmë dhe nuk mund të mos përjetojmë edhe njëherë dramën e madhe të rënduar edhe nga situata e këtij viti, ku vdekja na ka cikur kaq pranë, na ka ardhur te të afërmit tanë, te të dashurit, te profesionistët. Vetëm dje humbëm dy mjekë të dashur dhe një profesoreshë, dhe shumë të tjerë, që në këtë bilanc vdekjesh tingëllojnë si një bilanc lufte. Në këto momente do donim ta përballonim si shoqëri, si qeveri, me dinjitet këtë situatë dhe besoj këtë kemi bërë, jo vetëm duke alokuar buxhet, që e kemi për detyrë, por edhe si njerëz, si profesionistë, qytetarë e politikanë, duhet të jemi të kujdesshëm me fjalët tona, se fjalët vrasin. Nuk mund të vë në dukje se sa pa dinjitet është përballur opozita me këtë situatë. Jepen opinione lloj-soj mbi situatën, pa asnjë kujdes mbi bilancin ku jemi. Qeveria ka tre strategji deri më tani, që po i zbaton pikë për pikë, përfshirë dhe skenarët e rëndë të vjeshtë-dimër për të cilët jemi përgatitur.”, shtoi Spiropali. /Opinion.al
