Ministrja e Shtetit për Marrëdhëniet me Parlamentin, Elisa Spiropali është shprehur se mazhoranca do të ulej në tryezën e dialogut me presidentin Ilir Meta dhe kreun e PD, Lulzim Basha, vetëm nëse ata do të njohin rezultatin e zgjedhjeve të 30 qershorit.
“Presidenti është në proces shkarkimi, derisa të shkarkohet ne e respketojmë si Presidnet të Repubblikës. Ju e keni dëgjuar gjuhën e Presidentit, ajo nuk është gjuhë për dialog. Në rast se Meta Basha e Kryemadhi e Berisha njohin rezultatet e 30 qershorit atëherë patjetër. Të njohin zgjedhjet dhe të vazhdojnë përpara. Ne e kemi theksuar gjithmonë që tryeza është ajo ku bëhen diskutime”,-tha Spiropali.
Ministrja ka folur në “Abcnews” dhe përballjen në distancë mes saj dhe ish-deputetes së LSI-së, Nora Malaj. Teksa ka thënë se me Malajn ka një marrëdhënie të mirë, shton se si zysh ajo e ka bërë të ndihet krenare për ish-nxënësen e saj.
“Unë nuk kam pasur anjë përballje atë kanë patur një përballje me mua. Unë i jam përgjigjur vetëm Presidentit të Republikës. Me të tjerët nuk merrem. Më zyshë Norën kam një marrëdhënie të mirë dhe e di që ia kanë dhënë zyshë Norës për ta shkruar dhe nuk e ka bërë me gjithë zemër, sepse zyshë Nora e di se çfarë nxënësje kam qenë unë tek “Qemal Stafa” dhe besoj se e kam bërë krenare. Ka qenë nëndrejtorëshë e shkollës deri në vitin e dytë, sepse unë kam fituar më pas një bursë për të filluar në një kolegj ndërkombëtar. Por zyshë Nora e di mirë se nga ato kompeticionet, olimpiadat e deri tek konkurset e poezisë më çonte mua si përfaqësuese. Nuk besoj se është zhgënjyer shumë. Por patjetër që Presidenti i Republikës ka një vend të veçantë në zemrat e tyre, kështu që nuk mund ta zëmë atë vend”.
Çfarë shkruante Nora Malaj për Spiropalin dy ditë më parë
Një këshillë për ish-nxënësen time Elisa!(Spiropali) Elisa, si mësuesja jote, që në adoleshencën tende të kam përkrahur dhe promovuar, teksa të dëgjoj të fyesh dhe të dalësh jashtë etikës dhe qytetarisë, veçanërisht figurën e Presidentit të vendit tend, të votuar dhe zgjedhur nga Partia që ti përfaqëson dhe që çdo shqiptar e bënë të ndjehet krenar, më bën të ndihem keq, që më paska ikur mundi dëm. Por, të kujtoj një thënie të mençur të popullit tonë: “Para të madhit e prapa kalit (qoftë edhe ai i Skënderbeut) mos qëndro“!
Kujdes, se gjuha kocka nuk ka, por kocka thyen. Unë të kam mësuar që fjala është e shenjtë dhe nuk duhet keq përdorur, aq më tepër kur bëhet sharëse e fyese dhe përdoret në gojën e një zonje, nëne dhe ministreje, të bënë të ndjesh dhimbje.
Mos merr modelet që të shpërfytyrojnë, por modelet që të nderojnë. Jeta është e gjatë, por duhet jetuar me dinjitet, jo me gjuhën e rrugës dhe rrugaçërisë. Kjo ishte një këshille për ty, pas kësaj maskarade zgjedhore, ku çdo politikan i pozitës dhe opozitës duhet të ndjej përgjegjësi./ Opinion.al E.Xh.
