Ministrja për marrëdhëniet me Kuvendin, Elisa Spiropali ka reaguar për vendimin e Presidentit Meta për të kthyer në Kuvend ligjin për ndryshimet në Kodin Penal.
Vendimin Spiropali e quan “krisëm të dyfekut presidencial” dhe sipas saj kjo tregon se “se nuk kemi më President, po në vend të Presidentit na ka mbetur një karikaturë e vetë Ilir Metës”.
Ajo akuzon Metën se me një fjalor të katandisur si mos më keq ai ka qëlluar opozitën parlamentare dhe në të njëjtën kohë i drejtohet Presidentit si “Baba Xhike”.
“Kur votojmë shtrëngimin e litarit të ligjit kundër dhunës në sport apo dhunuesve në tërësi, nuk kemi ç’presim tjetër nga Baba Xhikja i zjarrit të kërcënimeve ndaj zgjedhjeve, i dekreteve molotov për destabilizimin e vendit, i fjalimeve halucinante kundër ambasadës amerikane dhe delegacionit të BE-së në Shqipëri” shkruan Spiropali.
Ajo ironizon edhe postimet e fundit të presidentit
“Qeni i kthyer në manar në krahët e tij, tifozët skocezë të kthyer në elektorat në sytë e tij, tërmeti apokaliptik i kthyer në qëndrim zyrtar me vulën e tij dhe ngjitja majë maleve e projektuar si karshillëk kreshnikësh ndaj botës mbarë, në mendjen e tij, flasin qartë që presidenti na ka lënë”.
Këtë status të ministres më vonë e ndau në profilin e tij në Twitter edhe kryeministri Edi Rama. /Opinion.al
— Edi Rama (@ediramaal) August 7, 2019
