Spartak Braho; Doshi-Prifti skemë për të akuzuar Metën

Spartak Braho ka lëshuar tymuesen e radhës, duke trazuar edhe njëherë ujërat në politikën shqiptare. Ashtu si edhe më herët Braho i është gjendur në krah kryetarit të tij të partisë Ilir Meta, sa herë që ky i fundit gjendet në vështirësi politike. Menjëherë pasi deputeti Tom Doshi deklaroi se Spartak Braho ka vrarë gjatë regjimit komunist ushtarë 18 vjeçarë, kreu i Komisionit Parlamentar të Sigurisë doli në një konferencë për shtyp duke deklaruar se u ka dërguar një letër institucioneve më të larta të shtetit ku u shkruan se vendi gjendet në një skenar të rrezikshëm destabilizimi. Letra i është dërguar Presidentit të Republikës, Kryeministrit, Prokurorit të Përgjithshëm dhe Drejtorit të SHISH. Sipas Brahos familjarët e Kastriot Ismailaj ish-administratorit të DIA-s po kërcënohen më qëllim përfshirjen e Ilir Metës në aferën e CEZ. Kërcënimi po sipas Brahos është bërë nga Tom Doshi i cili ka takuar në një lokal luksoz gruan e Ismailajt dhe se i përfshirë në këtë skemë është edhe ish-deputeti Dritan Prifti, i njohur tashmë për armiqësinë që ruan me Metën.