Në Spanjë, qytetarët votojnë sot në zgjedhjet e përgjithshme, që shënojnë dhe zgjedhjet e treta në katër vitet e fundit. Votimet kanë nisur në orën 9:00 sipas orës lokale dhe pritet të përfundojnë në orën 20:00.
Fushata është karakterizuar me rritjen e lëvizjes së të djathtës ekstreme, Vox, e cila kundërshton multikulturalizmin dhe ka kërcënuar se do të heqë të drejtën e vetëqeverisjes për rajone të tilla si Katalonja, ndërkaq kryeministri socialist, Pedro Sanchez e ka pozicionuar veten si person që kundërshton rritjen e të djathtës ekstreme.
Sipas sondazheve, Partia Socialiste e kryeministrit Sanchez do të udhëheqë në këto zgjedhje, por nuk do të mund të qeverisë e vetme pa koalicione, pasi asnjë grup nuk do të mund të fitojë një shumicë në parlament.
Katalonja ka qenë sidoqoftë tema më e rëndësishme e fushatës, që edhe ka fuqizuar populistët. Ky rajon gjysmë-autonom mbajti një referendum për pavarësi në tetorin e vitit 2017 dhe shpalli pavarësinë nga Spanja disa javë më vonë. Dhjetëra liderë të Katalonjës, që atëherë, janë gjykuar në Madrid dhe përballen me një sërë akuzash, përfshirë rebelim dhe kryengritje. Analistët thonë se çështja e Katalonjës do të vendosë fituesit./Opinion.al
