Andriy Portnov, ish-politikani ukrainas u ekzekutua me armë zjarri këtë të mërkurë në Madrid të Spanjës. Siç raportojnë mediat ndërkombëtare, ngjarja ndodhi rreth 09:15 të mëngjesit me orën lokale, jashtë një shkolle në zonën e pasur Pozuelo de Alarcón. 52-vjeçari po çonte fëmijët në shkollë.
Portnov, ish-ndihmës/këshilltari ish-presidentit ukrainas Viktor Yanukovich, ishte akuzuar për tradhti dhe korrupsion në Ukrainë dhe njihej për lidhjet e tij pro-ruse. Nga të dhënat e deritanishme, ai u qëllua me të paktën pesë plumba, në kokë dhe shpinë. Pas vrasjes autorët u larguan drejt një zone të pyllëzuar aty pranë dhe vijojnë të mbeten në arrati.
Ky incident shton një seri krimesh të dhunshme që kanë përfshirë ukrainas dhe rusë në Spanjë që nga pushtimi rus i Ukrainës në vitin 2022. Në mesin e tyre përfshihen sulme me bomba postale dhe vdekje misterioze. Autoritetet spanjolle po hetojnë vrasjen, megjithatë për momentin nuk ka të dhëna për autorët apo motivet e ngjarjes në fjalë.
Andriy Portnov ishte një ndihmës i lartë i ish-presidentit pro-rus të Ukrainës, Viktor Yanukovych, i cili në mënyrë të diskutueshme hoqi dorë nga nënshkrimi i marrëveshjes së asociimit të Ukrainës me BE-në, duke shkaktuar protesta të përgjakshme në vitet 2013-2014. Gjatë presidencës së Yanukovych-it, Portnov shihej gjerësisht si një figurë pro-Kremlinit dhe ishte i përfshirë në hartimin e legjislacionit për ndjekjen penale të pjesëmarrësve në revolucionin e vitit 2014.
Pas largimit të Yanukovych-it nga Ukraina për në Rusi, në shkurt 2014, pas muajsh trazirash që përfunduan me dhjetëra protestues të vrarë nga forcat e tij në Kiev, Portnov u vendos në lista sanksionesh nga Perëndimi, përfshirë BE-në dhe Kanadanë, për veprimet e tij si pjesë e administratës së mëparshme.
