Edhe pse Mauro Icardi është rikthyer prej 10 ditësh në stërvitje nën urdhrat e Spallettit, trajneri zikaltër sërish nuk e ka grumbulluar për ndeshjen me Lazion. Pavarsisht mungesës së Lautaro Martinezit, në konferencën për shtyp të dhënë para ndeshjes, Spalletti ka konfirmuar lënien jashtë grumnullimit të Icardit, ndërsa është shprehur se do të vlerësojë situatën për ndeshjet në vijim.
“Për shumë arsye e kam parë si një lojtar të ri, pasi nuk stërvitet prej shumë javësh me ne. Pikërisht për këtë arsye, duhet ta përfshijmë gradualisht në skuadër dhe për shumë gjëra që kam parë, kam menduar se ai nuk është gati të ndihmojë skuadrën në fushë. Ndaj vendosa që të mos e grumbulloj për ndeshjen e sotme, ndërsa për takimet e ardhshme, do të bëjmë vlerësimet”, tha Spalletti.
Por duket se nga ky vendim ka mbetur i habitur edhe avokati i sulmuesit argjentinas, Paolo Nicoletti, i cili bëri ndërmjetësimin mes Icardit dhe drejtuesve zikaltër, për të mundësuar sheshimin e mosmarrëveshjeve mes palëve.
“Që ditën që u rikthye, Mauro u vendos plotësisht në dispozicion të skuadrës, me profesionalitet, duke ndjekur edhe këshillat e mia, që ishin në interesin e lojtarit dhe Interit dhe që i kishim mbyllur me administratorin Giuseppe Marotta dhe presidentin Steven Zhang. Vendimin për të mos grumbulluar Icardin, nuk e prisja, por duke mos ditur arsyet, nuk mund të komentoj tani. Mund të them vetëm se kam folur çdo ditë me Marottën, i cili më ka konfirmuar se rikthimi i Icardit po ecën me hapa tejet pozitivë”, tha Nicoletti, duke shprehur habinë për mungesën e grumbullimit të argjentinasit.
Interi do të përballet me Lazion mbrëmjen e sotme në “San Siro”, në një sfidë shumë të rëndësishme për renditjen në zonën Champions. Në rast fitoreje, zikaltrit do të përforconin pozitat e tyre në këtë zonë dhe do të mund të vijonin të qetë sezonin./Opinion.al
