Prokuroria e Posaçme Kundër Korrupsionit dhe Krimit të Organizuar është drejt përfundimit të hetimeve për vrasjet e Vajdin Lamajt dhe Klodian Saliut.
Mësohet se prokurori i çështjes i ka komunikuar akuzat Lulzim Berishës, Indrit Rusit dhe Viktor Ymerit të cilët priten të merren të pandehur për dy vrasjet e bujshme të vitit 2005.
Dy ngjarjet ishin të pazbardhura edhe pse hetuesit në atë kohën kishin dyshime se, kush mund të ishin ekzekutorët. Dosjet e dy ngjarjeve u rihapën rreth 3 vite më parë.
Ndërsa ditën e nesërme pritet që akuzat për këto ngjarje t’i komunikohen edhe personave të tjerë të vënë nën hetim, Emiljano Shullazit e Indrit Taullaut.
Për dy vrasjet, të pandehur janë marrë, Indrit Rusi, Viktor Ymeri, Emiljano Shullazi, Plarent Dervishaj, Lulzim Berisha, Indrit Taullau dhe Luftar Reci. Në kërkim vijojnë të jenë Dervishaj dhe Berisha.
Ndaj tyre SPAK ka ngritur akuzat e “Vrasjes me paramendim” kryer në bashkëpunim në formën e grupit të strukturuar kriminal, “Mbajtjes pa leje të armëve luftarake me pasoja të rënda”, “Grup i strukturuar kriminal”, si dhe të “Vrasjes në rrethana të tjera cilësuese”, kundër dy ose më shumë personave, të kryer në bashkëpunim në formën e grupit të strukturuar kriminal.
Ka qenë dëshmia e Luftar Reçit, i penduar i drejtësisë, që çoi në zbulimin dhe zbardhjen e plotë të 2 ngjarjeve kriminale, ku u ekzekutua Klodian Saliu si dhe biznesmeni Vajdin Lamaj me mikun e tij të fëmijërisë, Artan Arsi.
