Prokuroria e Posaçme ka kërkuar dënimin me 25 vite burg për Gjergj Çukalin, i akuzuar për vrasje të mbetur në tentativë dhe grup kriminal.
Gjergj Cukalit, i njohur si i “forti” i “Myslym Shyrit” akuzohet se është porositës i atentatit me minë të Altin Xhuxhës alias Gjon Mena më 9 shkurt 2021 në Kamëz.
Atentat me tritol kishte si qëllim ekzekutimin e Altin Xhuxhës, i cili mbeti i gjymtuar nga shpërthimi.
Zbardhja e kësaj ngjarjeje nxori sërish në skenë Gjergj Cukalin, i cili përfundoi në pranga si porositës i kësaj ngjarjeje. Ai akuzohet se kishte “punësuar” dy kushërinj nga Zall-Bastari, Enver dhe Ermond Jamaku , 33 e 24 vjeç, për të montuar minën në makinën e objektivit të tij.
Për Enver dhe Ermond Jamakun që bashkëpunuan me drejtësinë për zbardhjen e disa ngjarjeve kriminale, u kërkua dënimi me 8 vite burg. Ndërsa për Blendi Dedën dhe Flor Abazin 22 vite heqje lire dhe për Paris Prengën 21 vite burg.
